Saligaatsoq peqataaffigineqarluartoq
Saleeqataasut ukiup siulianut sanilliullugit amerlanerupput, ataqatigiissaarissullu CSR Greenlandip peqataasut amerlanerat nuannaarutigaa.
- Kalaallit Nunaata avatangiisianut pinngortitamullu soqutiginninnerput amerlasuunit tapersersorneqarmat nuannaarutigaarput, aaqqissuussinermi aqutsisoq Lotte Kirkegaard CSR Greenlandimeersoq oqarpoq.
- Eqqakkanik katersilluni aaqqissuussineq Saligaatsoq suliffeqarfiit pinerullugit aaqqissuussineruvoq, suliffeqarfiit mikinerusut anginerusullu sulisui namminneq piumassutsiminik eqqakkanik katersipput, naak sila nilleraluaqisoq, eqqakkanik katersilluni aaqqissuussinermi ataqatigiissarisoq Lotte Kirkegaard oqarpoq.
Eqqakkanik katersilluni aaqqissuussinermi sulisut amerlanerpaat saleeqataasut suliffeqarfimmi Permagreen Greenlandimi sulisuupput, taakkua sulisui 60-it missaaniittut eqqakkanik katersipput, tassalu Nuummi iliveqarfiup nutaap eqqaanit aanaap illua aqqusaarlugu mittarfiup tungaanut eqqakkanik katersipput.
Containerit eqqakkanut atugassaat ulikkaapallanneqarput, taakkulu suliffeqarfiup biilii atorlugit assartorneqarput.
Eqqakkat katillugit 27 tonsit katersorneqarput - agguaqatigiissillugu saleeqataasoq ataaseq 60 kiilunik katersisimalluni.
Eqqakkanik katersilluni aaqqiissuussineq Saligaatsoq Qaqortumi ippassaq ingerlanneqarpoq. Ullumikkut Sisimiuni eqqakkanik katersisoqassaaq aamma inissiaatileqatigiffik A/S INI nuna tamakkerlugu saliisitsiniarpoq arfininngorpat juunip ulluisa arfineq aappaanni.
