Saleeqataasimasut neriuutissaqalerput

oktobarip 01-at 2004 08:04

Timmisartorsuup 1968-mi Thulemi sakkutooqarfiup eqqaani nakkarnerani saleeqataasimasut neriupput eqqartuussisulersuusinertik nanginneqassasoq. Massakkut neriuutigineqalerpoq taamanikkut pisumi paasissutissat tamaasa Danskit naalakkersuisuisa saqqummiussinnalissagaat. Suliassaq ullumikkut EU-mi naammagittaalliuteqartarfimmi suliarineqarpoq. 1995-mi suliassaq Danskit naalakkersuisuinit mattunneqarpoa, taamanikkut saleqataasimasut 50.000 koruuninik taarsiiffigineqarlutik. Taamanikkut saleeqataasimasut paaserusuttuarsimavaat radiop qinngorneri ulorianartut akuusimassanersut 1968-mi januaarimiit septembarimut timmisartup nakkarfiata eqqaani saliisoqarnerani.

Ullumilu tassa EU-mi naammagittaalliutinik suliaqartartut suliaq pillugu ataatsimiiput, Danskillu naalakkersuisui suliamik ingerlatsisimanerat pillugu uparuarneqarput. Danskit naalakkersuisui peqquneqarput paasissutissat tamaasa saqqummiuttariaqaraat. Imaluunniit taamanikkut saleeqataasimasut nakorsaniit misissorluarneqarnissaat piumasaqaataalluni.

Taamanikkullu saleeqataasimasut 1200-it amerlanersaat toqoreersimapput, sinnerilu tassa misissorluarneqarnissaat piumasaqaataavoq. Tamannalu Danskit naalakkersuisuisa itigartissagaluarpassuk EU kommissioni piumasaqarsinnaavoq, Danskit naalakkersuisuisa EU-mi eqqartuussiviit qullersaanut sassartinneqarnissaanut.

Ullumilu suliaq EU-mi naamagittaalliuteqartarfimmi suliarineqarmat Danskit naalakkersuisui aggersarneqarsimagaluarput takkuttoqarsimananili, takkuttutuaq tassaasimalluni Jens Peter Bonde, eu parlamentimi ilaasortaasoq.