SAKO-nut patrone-t qaartoortitsisinnaapput.

Finlandimiut SAKO-nut patruuniliaat Pilersuisumi tunisaasut manngertornilernermikkut qaartoorsinnaammata, Pilersuisup suli katersorpai.

Qoorortuup patrone-ssai navianarsinnaasut utertinneqartariaqalissapput 1990-imiit 1992-i ilanngullugu sanaajusimappata patrone-llu taakku nataavani allaqqappata: SAKO 308.

Utertinneqartariaqanngillalli puuani allaqqappata 1992-p kingorna sanaajusut nataavanilu allaqqappata SAKO 308 Win.

- Maannamut patrone-t SAKO-minngaanneersut kaliper 308-t poortat tallimat Saattuni nassaarineqarput, taakkualu pisiniarfimminngaanniit peerneqarput, kingusinnerusukkut patrone-liorfimmut SAKO-mut nassiunneqarnissamik tungaannut, pilersuisumi nioqqutissanik piniartartoq Manasse Lennert taama oqarpoq.

Taanna aperaarput, patronet taakku qanoq akornuteqarnersut.

- Imatut akornuteqanngikkaluarput, kisianni kukkusumik nakkutigigaanni, soorlu manngertornisussanngorlugit ilisimagaanni manngertornersimappataluunniit ulorianaateqarsinnaagamik, Manasse Lennert taama oqarpoq,

Taanna apereqqipparput, taama ittut patronet atorneqarpata qanoq kinguneqarsinnaanersoq.

- Imatut kinguneqarsinnaapput, iginnermi qaartoortoqarsinnaasoq, unali erseqqissaatigissavara patrone-liorfiup SAKO-p Finlandimiittup nalunaarfigimmatigut annikitsuinnaat kisimik Kalaallit Nunaanut apuunneqarsimasinnaasut. Ajoquteqarsimasinnaasullu amerlanerpaat Finlandimi tunisaasimammata, Manasse Lennert oqarpoq.

Taanna aamma oqarpoq, pilersuisup pisiniarfiini tamani illoqarfinni nunaqarfinnilu patronet taama ittut ujartorneqartut. Pisiniarfiilli ilarpassui suli tusagaqarfigisimanngilai, arlalli aamma nalunaarsimapput taama ittunik patrone-nik peqaratik.