Sakkutuut sillimmatigineqarallassapput

Israelimiut sakkutuutik Libanonip killeqarfianiittut 30.000-inik ilarusuppaat. Israelimiulli upalungaarsimanermut ataatsimiititaliaani ilaasortat sakkutuut taakku sillimatinneqarallassasut aalajangerput.

Israelimiut sakkutuui sillimatinneqartussat Libanonip killeqarfiani qaartartumeerisaqattaartunik ikiuissapput. Ikiuunnermilu saniatigut sakkortunerusumik saassussisoqassagaluarpat sillimatinneqassasut, israelimiut naalakkersuisuinit nalunaarutigineqarpoq.

Nunap qaatigut Libanonip saassunneqarnissaa israelimi naalakkersuisooqatigiit ilaannit siunnersuutigineqaraluartoq illersornissamut ministerip siunnersuut akuererusunngilaa oqarluni silaannakkut saassussisaqattaarnerit sakkortusitinneqassasut kiisalu pigasuartumik Libanonimi hizbollah-kkunnut ilaasortanik saassusisaqattaarnerit amerlisinneqartariaqartut.

Israelimiut nalunaarput hizbollah-kkunnut ilaasortat arlallit Libanonip killeqarfiata eqqaani toqorarsimallugit. Akersuunnerit aallartimmatali israelimiut sakkutuui quligiluat ippassaq toqutaapput. Israelimiut imminnut illersorlutik qaartartumeeriuarput hizbollah-kkullu 48-eriarlutik qaartartumeerineri pinngitsoortissinnaasimanngilaat. Qaartartullu qaarnerisa kingorna sakkutuujunngitsut arlallit ikilerneqarput.

Israelimiut Gazami aamma akersuupput.

Nunat tamalaat aallartitaasa ippassaq Romimi ataatsimiinnerminni sakkuaakkunnaartoqarnissaa isumaqatigiissutigigaluaraat israelimiut aaqqiisoqarnissaata tungaanut qaartartumeeriuarniarlutik aalajangerput. Taamatut aalajangerneq ataatsimeeqataasut ilaasa sakkortuumik avoqqaaraat.

- Ataatsimiinnitta siunertaa paatsorneqangaatsiarsimavoq. Akersuunnerit erngerlutik unitsinneqarnissaat kissaatigaarput, Tysklandip nunanut allanut ministeria oqarpoq.