Sakkutuut Qinngutsinni najugaqassapput
Issittumi Sakkutooqarfik Nuummi pisortatigoortumik oktobarip ulluisa 31-anni atoqqaartinneqartussaavoq, sakkutuunullu sulisussanut inissat nassaarineqarsimasut, Atuagagdliutini ippassaq saqqummersinneqartumi taama allaaserisaqartoqarpoq.
Naak Nuummi inissaaleqisoqaraluaqisoq sakkutuut imarsiortut inissianut nutaaliarsuarnut kusanaqisunut inissinneqartussanngorput, illoqarfiup immikkoortortaani Qinngutsinni inissinneqartussanngoramik.
Illorsuaq inissialik sakkutuut pisiarisimaneraat, attartorneqarsimanersorluunniit AG-mi allaaserineqanngilaq, sulisunulli pisortaq, oberstløjtnant Michael Mouritsen ima oqarpoq:
- Maanga aggersarneqarpugut, Qinngutsinnilu inissiarsuarmi akeqanngitsumik najugaqassalluta, kisianni akeqanngitsumik najugaqartinneqarnerput akileraarutigisussaavarput. Soorlu aamma sulisut tamakkiisumik Kalaallit Nunaannut akileraartussaallutik, Michael Mouritsen AG-mut oqarpoq, taamatullu aaqqissuussineq nuannaarutigalugu:
- Taamaalilluta illoqarfimmi sumi tamaani inissiarpassuarnik attartussanngilagut inuilli ataatsimut katersuullutigik. Taamaaliornikkut aamma inuit assigiimmik atugaqarnissaat qulakkeerneqarpoq, Michael Mouritsen oqarpoq.
Issittumi Sakkutooqarfik Royal Arctic Line-ip Nuummi Atlantikup talittarfiani qullersaqarfigisimasaanni, oktobarip 31-ani pisortatigoortumik atoqqaartinneqartussami inissisimassaaq, Ataqqinartorsuaq Dronning Margrethe, Illersornissamut ministeri Nick Hækkerup, qallunaat sakkutooqarfiani pisortaq Peter Bertram, Naalakkersuisunut ilaasortat, Inatsisartunullu ilaasortat atoqqaartinneqarnerani ilaatigut peqataassallutik.
