Sakkutuut naalagaat USA-mik isornartorsiuivoq

Nunat Killiit Illersoqatigiiffianni, NATO-mi, Afghanistanimi naalagaanertap Stanley McChrystalip Washingtonimi naalakkersuisut pillugit sakkortuumik arlalissuarnik isornartorsiuinera atuagassiami issuarneqarpoq. Isornartorsiugaanut ilaapput præsidentip tullersortaa, Joe Biden, aamma USA-p Afghanistanimi immikkut aallartitaa, Richard Holbrook.

Allaaserisaq McChrystalip siunnersortaasa generali sinnerlugu atuagassiamut saqqummiussimavaat. Ilaatigut allassimavoq McChrystalip præsident Barack Obamamik præsidentip illorsuani Inimi Ammaloqisaami, Det Ovale værelsemi, pernaammik ataatsimeeqateqaqqaarnini pakatsissutigisimagaa.

Atuagassiami Rolling Stone-imi ilanngutassiaq ilanngunneqareersorlu sakkutuut oqarput, McChrystalip tusagassiuutinut siunnersortaa, Duncan Boothby, tunuartoq.

McChrystal Washingtonimut oqaloqatiginnikkiartoqquneqarsimavoq.

Generalip siunissaa USA-mi illersornissamut ministerip, Robert Gatesip, nalorninartoqarnerarpaa, erseqqissumillu oqarluni, McChrystal "ersarissumik kukkuluttorsimasoq naliliinerlorujussuarlunilu.

Barack Obama præsidentinngormalli generali aatsaat tusaamanerlugaalinngilaq.

McChrystal inuttut nammineq præsidentimit siorna oqaloqatigiumaneqarpoq, oqareerluni, peqqarniisaartarneq qunutitsisarnerlu pillugit præsidentip tullersortaata iliuuseriniagaasa Afghanistan "Kaos-istan"-inngortissagaat.