Sakkutuut marluk peqqarniitsumik pinngitsaaliisimasutut unnerluunneqarput
Danksit aviisiat Ekstra Bladet-ip allaaserissaa naapertorlugu angutit inuusuttut taakkua kunngikkormiut umiarsuaanni Dannebrogimi sakkutuutut inuttaatillutik siorna aasakkut sapaammi juulip 17-iani Kunngikkormiut Nuummiinneranut atatillugu Dannebrogip taleqqanerani, inuusuttut pinngitsaaliillutik arnerisimapput.
Dannebrogip Nuummiinnerani angutit inuusuttut unnerluunneqartut nunaliarsinnaatitaanertik atorlugu illoqarfiliarput imerniartarfiliarlutillu. Imerniartarfimmiitillutik kalaaleq arnaq naapippaat, eqqartuussivimillu unnerluussissutigineqartut naapertorlugit, angutit taakku marluk arnaq imerniartarfiup eqqaani containerip tunuanukaappaat.
Containerip tuuani angutit taakkua marluullutik arnap qarlii truusiillu perpaat, aviisi Ekstra Bladet taamatut allaaserisaqarpoq.
Taamaalioreeeramik arnaq peqqarniitsumik pinngitsaaliillutik arneriffigaat tamatumalu kingorna pinngitsaalisartik qimaannarlugu qimaallutik.
Eqqartuussinermi unnerluussisup politifuldmægtigip Michael Bo Hansenip aviisimi Ekstra Bladet-imi apersorneqarluni oqaatigaa, angutit inuusuttut unnerluunneqartut Nuummi Eqqartuussivimmi eqqartuunneqarnissaat pillugu Danmarkimit tikisinneqarsimasut.
Angutit inuusuttut pinngitsaaliillutik arnerisimasutut unnerluunneqarnerminnut pinngitsuunerarput, marluullutilli arnamik atoqateqarsimanertik nassuerutigalugu. Arnap taassuma nammineq atoqatigineqarnissamut akuersisimanerangaalluni eqqartuussinermi oqaatigineqarpoq.
Eqqartuussineq ullumi nanginneqassaaq, tamatumuuna ilisimannittutut nassuiaateqartussaq Danmarkimiittoq video atorlugu uppernarsaatinneqassalluni.
Unnerluussisup kissaatigaa angutit inuusuttut marluk qaammatini 18-ni pineqaatissinneqarsimasunut inissiisarfimmiitussanngortinneqassasut, arnallu anniartinneqarneranut 70.000 koruuninik taarsiiffigineqarnissaanik.
Angutit inuusuttut unnerluunneqartut pinngitsuutinneqarnissaat angutit illersuisuata piumasaraa, arneriffigineqarnerangaasorlu nammineq piumassutsiminik atoqatigisimanerarlugit oqaatigalugu.
