VIDEO Sakkutuut kalaallisut oqaasillit pisariaqartinneqarput

- Amerlanerusut illersornissamut sulisussat atorfinitsikkusuppagut, Kim Jesper Jørgensen Illersornissamut ministerieqarfimmi immikkoortami pisortaq KNR-imut oqarpoq.

Sakkutuunngorniarnissamut pilerilersitsiniaalluni illoqarfinni arfineq marlunni paasisitsiniaanerit aasaq ingerlanneqarput.

- Atuareeruma sakkutuunngorniassaanga, tassa atuarnera naammassigukku immaqa ingerlaannaq, Aqissiaq Møller Lynge maajimi KNR-imut oqarpoq.

Aamma atuaruk ASSIT Illersornissaqarfiup Nuummi paasititsiniaanera inuusuttuaqqanit soqutigineqarluarpoq

Soqutiginnittut 111-t atuagarsornikkut timimillu atuisinnaanermut Nunatsinni misilitsipput. Aatsaalli Danmarkimi misilitseqqaarluni sakkutuutut ilinniartoqarsinnaavoq.

- Kalaallit Nunaanni siullerpaamik taamatut paasisistsiniaavugut soorlu sakkutuutut suut ilinniagarineqarsinnaanersut pillugit paasisitsiniaalluta, inuusuttullu misilitsissinnaanissaannut periarfissillugit, Kim Jesper Jørgensen oqarpoq.

Maannamut marluk isumaqatigiissuteqarfigineqarput

Sakkutuunngorniarnissamut paasisisitsiniaasoqareersorlu sakkutuutut imarsiortutut ilinniarnissamut marluinnaat massakkumut isumaqatigiissuteqarfigineqarput. Amerlinissaalli naatsorsuutigaat.

- Piareersarfinni ilinnialerusuttunut siunnersuisartut oqaloqatigillattaanerani ilisimatinneqarpunga kalaallit inuusuttai arlaqartut Danmarkimi ilinniarusuttut taamaammat oktoberimi novembarimilu siunissamilu amerlanerusut ilinnialernissaat naatsorsuutigaara, major Torben Grinderslev Illersornermut ministereqarfimmit KNR-imut oqarpoq.

Aamma atuaruk VIDEO Kalaaleq sakkutooq kunngikkormiut umiarsuaannik malinnittuuvoq

Sakkutuunngorniarnermi Danmarkimut ilinniariartarneq danskisullu oqaatsit aporfiusarneri kalaallit sakkutuunngorniarlutik ilinniartartut ikinnerannut pissutaasorineqarpoq. Kalaallilli amerlanerit sakkutuunngortaleriarpata qinnuteqarusuttut amerlissasut naatsorsuutigineqarpoq.

- Naatsorsuutigilluinnarpara iluatsissinnaassasoq, amerlanerusullu ilinnialertalerumaartut, major Torben Grinderslev oqarpoq.

Sakkutuummi kalaallisut oqaasillit pisariaqartinneqarput.

- Kalaallit Nunaata imartaaniitilluni kalaallisut oqalussinnaasunik inuttaqarneq iluaqutaassasoq erseqqilluinnartutut isigaara, Kim Jesper Jørgensen oqarpoq.

Aamma atuaruk Issittumi sakkutuut annaassiniarnermik sungiusartut