Sakkutuut ikilisinneqalerput

USA-p Tuluillu præsidentii, sapaatip-akunnerata naalernerani Washingtonimi ataatsimeeqatigiilerunik, eqqartugassaannut pingaarnernut ilaassapput, USA-p Tuluillu sakkutuisa Irakimiit sukkanerusumik aniatinneqarnissaanut tunngasoq.

Sukkanerusumik sakkutuunik Irakimiit aniatitsisinnaaneq pisinnaalerpoq, Irakimi naalakkersuisooqatigiit pilersinneqarmata, taama tuluit aviisiat The Guardian allaaserisaqarpoq.

Tuluit sakkutuui Irakimiisinneqartut 8000-iusut ukioq manna 5000-iinnanngortinneqarnissaat siunniunneqarsimavoq, sakkutuunillu tunuartitsiortulernissaq juulip qaammataani aallartinneqassaaq. Aamma USA-p sakkutuui 130.000-it Irakimiisinneqarput, taakkualu 30.000-nik ilanngarneqassasut aviisi The Guardian allaaserisaqarpoq.

- Irakimi naalakkersuisooqatigiit inissinneqarmata, isumannaallisaanissaq pitsaanerulissasoq naatsorsuutigaarput, taamaammallu sakkutuunik ikilisaanissaq tullernguuppoq, Tuluit premierministeriat Tony Blair oqarpoq.