Sakkutuut eqqisseqatigiissitsiniartussat Darfuriliartinneqalerput

Darfurimut Naalagaaffiit Peqatigiit sakkutuuliiniarput. Naalagaaffiit Peqatigiit isumannaallisaaniaqatigiivi Sudanimi nunap immikkoortuanut tassunga sorsuffiusumut eqqisseqatigiinnissamut aalajangersakkamik kiisami isumaqatigiissuteqarput. Sakkutuut eqqisseqatigiissitsiniartussat 26.000-inik amerlassusillit oktobarimiit Darfurimi Sudanimiunut qimaasunut 1,8 millioniusunut eqqisseqatigiissitsiniarlutillu isumannaallisaajartussapput. Tamaani isumannaallisaasoqarnissaa pisariaqartinneqaqisoq Malene Haakonson Folkekirkens Nødhjælpimeersoq oqarpoq.

Pitsaasup tungaanut sunniuteqarsinnaassasut ilimagaara. Maanna eqqartugarput Darfur Frankrigitut annertussuseqarpoq maannakkorpiarlu suna tamarmi paatsiveqanngilaq. Taamalu ilimagineqarsinnaanani sakkutuunik 26.000-inik Darfuriliartitsinikkut aaqqiagiinngissutit anigorneqarsinnaassasut, Malene Haakonson oqarpoq.

Taanna maajimi Darfurimiikkami qimaasut suut pisariaqartinneraat maluginiarsimaneraa aperineqarpoq.

- Ilaqutariit maanna Darfurimut qimaasimasut 1,8 millioninik amerlassuseqartut illersorneqanngillat. Qimaaffigisaminniit anillakkaangamik pinngitsaalisaallutik arneriffigineqariaannaasarput, aamma tigusatut aallarunneqariaannaasarlutik. Taamaattumik arnat inuusuttut qisussanik aallertinnissaat mianersuutigineqartarpoq arnallu utoqqaat qisussanik aallertinneqartarput, taakkuli aamma pinngitsaalillugit arneriffigineqarsinnaasarput. Tassa illersorneqarnissamut pisariaqartitsisoqarluinnarpoq. Qimaasummi ilaqutariiupput nalinginnaalluinnartut nunaatiminnut uterusukkaluartut inuunertillu ingerlateqqillugu, mannali tikillugu tamanna ajornaqaaq.

Qimaasut Naalagaaffiit Peqatigiit sakkutuuinut isumalluarnersut apeqqutigineqarmat Malene Haakonson oqarpoq qimaasunit isumalluarfigineqartorujussuusut, tassami isumaqaramik sakkutuut takkuppata aaqqiagiinngissutit anigorneqassasut, tamannalu pakatsissutigissagunarpaat. Kisianni sakkutuuliisoqarneratigut Naalagaaffiit Peqatigiit Darfurimi pisut imminiiginnanngikkaat takusinnaassavaat, Malene Haakonson oqarpoq.