Sakkutuut danskit sisamat Afganistanimi ikiligaapput

Ilaat ataaseq ikilerneqangaatsiarpoq sinnerilu pingasut annikinnerusumik ikiligaallutik, Henrik Sommer sakkutuut aqutsisoqarfianeersoq taama paasissutissiivoq.

Sakkutuut taakku sisamat biilimik sakkutooqarfimmut Barakzai-mut ingerlaartillutik qaartartumik nunamut matoorussamik qaartitsisoqarneratigut ikilerneqarput.

Ikilerneqangaatsiartoq timmisartumik Danmarkiliaanneqarniarpoq nakorsanilli nalilerluarneqareeruni qaqugu Danmarkiliaanneqassanersoq aalajangerneqassaaq. Camp Bastionip napparsimmavittaani nakorsarneqarpoq. Ajunngilaq inuuneralu navianartorsiunngitsoq oqaatigineqarluni.

- Ikiligaasut sinneri pingasuusut sakkutooqarfimmiitinneqaannassanersut Danmarkimulluunniit angerlartinneqassanersut suli isummerfigineqanngilaq, Henrik Sommer oqarpoq.

Qaartoortoqareerneratigut ikiligaasut sakkutooqataasa ikiueqqaarlutik passuppaat. Kinguninngualu Camp Bastionimut qulimiguulimmik tamarmik ingerlanneqarput. Ikiligaasut marluk qulimiguulimmut nammineerlutik ikisinnaasimapput.