Sakkutuut annilaangasunngortut

Sakkutooq Danskeq Irakimiinnermini naalakkiummut naaggaarsimanini pissutigalugu qaammatini sisamani parnaarussassanngortinneqarpoq.

Danskit Irakimi sakkutooqarfiannit Camp Danevangimit alapernaarsuilluni angalanissamik naalakkiut sakkutuup itigartissimavaa, taamaalioramilu kisiartaasimanngilaq.

- Danskit Irakimi sakkutuuisa sorsunnissaminnut qunusarnerat takornartaanngilaq, sakkutuut palasiat Jørgen Christian Madsen aviisimi Ekstra Bladet-imi taama issuarneqarpoq.

Taanna qaammatini arfinilinni Irakimeeqqammerpoq, oqaluttuarporlu ullut tamaasa sakkutuunit oqaloqatigineqartarluni, ajornartorsiutiminnillu annisserusuttut imaaginnavinnerarlugit.

Sakkutuut sininneq ajulersarnermik eqqugaasimapput, annilaangasunngorsimallutik ajoqusernermillu kingunerlutsitsinermik eqqorneqarsimallutik.

Sakkutuulli naalagaasata Per Mikkelsenip, sakkutuut palasiata oqaasii uppernarsarusunngilai:

- Alapernaarsuiartorusunngitsunik naapitaqarsimanngilanga. Annilaangavugut, tamannalu pissutigalugu sukannersuulluta, Per Mikkelsen Camp Danevangimit Ekstra Bladet-imut oqarpoq.