Sakkutuut angerlaqquaat

juulip 13-at 2007 10:32

USA-mi innuttaasut quliugaangata arfineq marluk Irakimiit sakkutuunik angerlarartitsinissaq piumaneru-sarpaat taamatuttaaq Innuttaasut Sinnerlugit Sinniisoqarfimmi politikerit amerlanerussuteqartut angerlarartitsinissaq piumaneruvaat.

Unnuaq inatsisissamut siunnersuut amerikamiut sakkutuuvisa tamangajalluinnaasa qaammatit quligiliuat ingerlaneranni Irakimiit tunuartinneqarnis-saannut pingajussaanik akuersissutigineqarpoq.

USA-mi Innuttaasut Sinnerlugit Sinniisoqarfimmi politikerit aaliangiisinnaatitaagaluarpata aappagu aprilip qaammataani amerkamiut sakkutuui Irakimiittut tamangajammik angerlarartinneqassagaluarput.

Kisiannili aaliangiisinnaatitaannginnamik taamaliorsinnaanngilluinnarput.

Siunnersuulli USA-mi senatetimi (inatsisartunut) ingerlatinneqaqqaartussaavoq taakkualu inatsisissamut amerlanerussuteqarlutik akuersigaluarpataluunniit naggataatigut præsidenti inatsisissap itigartitsissutiginissaanut pisinnaatitaaffeqarpoq.

Oqareersimavorlu inatsisissaq akueriniarnagu.

Taamaammat unnuaq angerlarartitsinissamik siunnersuutip akuerineqarnerigalua sunniuteqarsinnaanngilaq.

Illersornissamut ataatsimiitsitaliami siulittaasup oqaatigaa, taamatut qisuariaateqartoqarnera amerkamiunut sorsukatalluinnartunut aammalu Irakimi politikeriusunut nammagassaqareeqisunut pingaarte-qarluinnartuusoq.

Irakimiut namminneq inuunerminni atugassatik akisussaaffigisariaqarpaat, neriuutigaaralu taamaaliorumaartut anguniakkatimmi pillugit ajugaasinnaapput ajorsarsinnaallutilluunniit, taama oqarpoq; Eik Skelton.

Irakimili piviusut qiviaraanni innuttaasut pitsaasumik atugassaqartitaanerat annikitsuararsuuvoq.

Irakimi parlamenti sap. akunnera tamaat naallugu ataatsimiissimanngillat, ullullu 14-it qaangiuppata aasaanerani qaammat ataaseq sulinngiffeqartussaapput,

Naak, inatsisissanut siunnersuuterpassuit upernassarli naammassereersimasussaagaluarlugit.

Naalakkersuisunilu sulineq pitsaanerunngivissoq nalilersuisartunit oqaatigineqarpoq, suliassammi tamarmik unittoorluinnarsimapput, sunni aamma shia-muslimit akerleriittuarnerat pissutaalluni.