Sakkutuut 21.000-t Irak-iliassapput

USA-p præsidentiata George W. Buship sakkutuut 21.000-inik amerlanerusut Irak-iliakaatinnialerpai.

- Irak-imi pissutsit Amerikamiunut akuerineqarsinnaanngillat. Uanga akuersaarsinnaanngilara namminneq kukkussutitik uannut akisussaaffigitinniartarmatigik, taama præsident Bush tv-kkut toqqaannartumik apersorneqarnermini oqarpoq.

Buship sakkutuut 17.000-t Bagdadimiitinniarpai sunni muslimit shiamuslimillu sorsuunnerannut eqqissisaajartoqqullugit. Sakkutuullu 4000-t nunap immikkoortortaata ilaanut Anbarimut pinerliiniaqatigiinnut al-Qaeda-kkunnut akiuukkiartoqqullugit aallartinniarlugit.

Taassuma taama pilersaarutaa Irak-imiit mianersortumik tigulluarneqarpoq, tassami kurderit inatsisiliortuat Mahmud Othman oqarpoq, taamatut sakkutuuleeqqittoqarnissaa imminerminnut nutaajunavianngitsoq.

- Naluara sakkutuut ilaneqaraluarpata iluaqutigineqassanersut, tassami Irak-imi upperisarsiorneq politikkilu pillugu sorsuuttoqarpoq, taakkulu imminnut paaseqatigiissinnaanngippata qanorluunniit sakkutuuliitigigaluaraanni iluaqutaanaviarunanngilaq. Ajornartorsiummi politikkikkut ajornartorsiutaavoq sakkutooqarnikkuunngitsoq, Othmann taama oqarsimavoq.

USA maannakkorpiaq 132.000-inik Irak-imi sakkutooqareerpoq.