Sakkutuup atuakkiaa eqqartuussisulersuunneqarpoq
Atuakkiarlu taanna ippassaq aviisip Politikenip tamakkerlugu naqiterpaa, tamatumalu kingunerisaanik aviisit ippassarnisat Danmarkimi tamakkerlutik pisiarineqarput - aamma maani Nuummi Politiken pissarsiariumaneqarluarpoq. Eqqartuussisullu suliassaq ullaaq aallartimmagu matoqqasumik ingerlanneqassasoq aalajangiunneqarpoq.
Suliassaq pillugu atuakkiortoq Thomas Rathsach aamma illersuisua Tyge Trier ullumi Københavnimi eqqartussivimmut ingerlanerminni annertunerusumik oqaaseqarusunngillat.
Suliassaq ilungersunartuuvoq tunngaviusumik aalajangiisuusussaasoq maannalu eqqartuussisumut saqqummiutissavarput.
Atuakkap akuerineqarnissaanut pingaarnertut suna tunngavilersuutigissavisiuk?
Tamanna eqqartuussisumut oqaatigissavarput. Ajuusaaraluarpunga.
Naqiterisitsisarfiup People´s press-ip atuakkiamik "Jæger i krig med eliten", atuakkiortumit Thomas Rathsachimit allanneqartumik ilumut naqiterisinnaaneranik suliassaq maannakkorpiaq suliarineqarpoq.
Poul Dahl 1990-imiit 1993-i tikillugu sakkutuunut pisortaasoq naqiterisitsisarfimmit ilisimannittutut aggersarneqarsimavoq.
Pisoq immikkorluinnaq ittoq uani naammattoorparput, Danmarkip sorsunnermut ilaanera aamma pinerliinianut sorsuunera uani eqqartorparput. Pinerliiniarnerlu ajornerpaaq ulorianarnerpaarlu tassaavoq takusinnaanngisat. Pinerliiniarneq ilisimasaqannginnermik ersiortitsinermillu aallaaveqartoq, ilinnut uannullu qoqassiiniartoq. Tamatumalu pinerliiniarnermik akiunissaraluartinnut taarsiullugu ersiulersippaatigut.
Eqqartuussisulersuussineq atuakkiamut sammitinneqarpoq aviisimut Politikenimut sammitinneqarnani, taanna atuakkiamik tamakkiisumik naqiterereernermi kingorna illersornissamut pisortaqarfimmit eqqartuussisunut tunniunneqarpoq.
Ritt Bjergegaardip atuakkiaa "En kommisærs dagbog" assingusumik iliuuseqarfigereerlugu 1995-imi Tyge Trier ingerlaannartumik atuutsinneqanngitsumik pineqaatissinneqarpoq.
Atuakkiamilli tamakkiisumik nuutsitsinermut atatillugu pineqaatissinneqarsinnaaneq 1995-imut sanilliullugu ullumikkut sakkortunerujussuusinnaasoq Peter Schønning eqqartuussissusilerisut Johan Schlüterimi piginneqataasoq oqarpoq.
Taama iliorneq unioqqutitsineruvoq annertungaatsiartoq, ukiummi tallimat matuma siorna piginnittuunermik unioqqutitsinerit pillarneqaataasarnerat arfinileriaammik sakkortusineqarput, taamaalilluni taama iliorneq tillinniarnermik pillaasarnernut naligitinneqalersimalluni. Pisunilu ajornerpaani immikkut ittuni ukiut arfinillit tikillugit paarnaarussaasoqarsinnaavoq, Peter Schønning oqarpoq.
Aviisip ilassutaani atuakkap allanneqarnera atuartartutut ippassaq ingerlateqqinneratigut Naalagaaffiup sillimaniarnera aviisip ulorianartorsiortileraa tunngavilersuutigalugu Illersornissaqarfiup Politiken ullaap tungaa politiinut unnerluutigaa.
