Sakkutuunik angallassineq eqqorneqariaannaavoq

Danmarkimi Illersornissaqarfimmiit timmisartuussinermut isumaqatigiissut ajornartorsiutigineqarpoq, tassani ilaatigut isumaqatigiissutaavoq sakkutuunik Kangilinnguani Sakkutooqarfimmukaassisarnissaq.

Danmarkip Radioanit nutaarsiassani oqaluttuarput, Danmarkimi Illersornissaqarfiup timmisartut sakkutuut atortussaannik Afghanistanimuunerusoq, aammali Kalaallit Nunaannut, Letlandimiit assartuisartussaq, ajornartorsiutigilersimagitik.

Timmisartut Letlandimiit atorneqartartut ilaatigut tassaapput, russit assartuutitut ukiut 30-t matuma siorna sanaavi, Ilyushininik ilisarnaatillit, timmisartullu taakkorpiaat EU-p timmisartuussinermut oqartussaasuinit ungasinngitsukkut qajannarpallaarnerarneqarput.

Kangilinnguani sakkutuut inuttut pineqarnissaannik isumaginnittut qullersaat, stabschefi Jan Bøgsted, Radioavisimut oqarpoq, ajornartorsiut nammineq ippassaq kingusissukkut tusarsimallugu, ilimaginngilaali Kalaallit Nunaanni Sakkutooqarfimmut sunniuteqarnissaa.

- Letlandimi timmisartoqarfimmiit sakkutuunik Narsarsuaq aqqusaarlugu qaammammut ataasiarluni Kangilinnguanukaassisoqartarpoq. Timmisartorli atorneqartartoq tassaavoq ilaasartaat nalinginnaalluinnartoq, MD-83, tassa Ilyushin-76-it, EU-mit maanna isornartorsiorneqartut, Kangilinnguani Sakkutooqarfiliaassinermi atorneqarneq ajorput.