Apuiffiusup nalaani videokkut immiussat iluaqutigalugit apuisoq sumiissuserneqarpoq.Assi: Midt- og Vestjyllands Politi

Sakkutuumik apuisoq toqutsisimasutut unnerluutigineqartoq

Karupimeersup, angutip 71-inik ukiullip kalaallimut, sakkutuumut 22-nik ukiulimmut mianersuaalliorluni toqutsisimasutut maanna unnerluutigineqarpoq.

Kalaaleq sakkutooq angummit 71-inik ukiulimmit siorna oktobarimi aportilluni ajunaarpoq, apuisorlu mianersuaalliorluni toqutsisimasutut maanna unnerluutigineqartoq, MIDTVEST allaaserisaqarpoq.

Jyllandimi Karupip timmisartoqarfiata eqqaani biilertoq siorna oktobarip ulluisa 14-anni apuereernermi kingorna biilerluni qimaavoq.

AAMMA ATUARUK Angut 71-inik ukiulik kalaallimik sakkutuumik apuisimasutut unnerluutigineqartoq

Biilertoq apuereerluni qimaasoq politiinit kingorna ujaarineqalerpoq.

Kalaaleq angut ajunaartoq, mittarfeqarfiup Karupip tungaanut aqqusinermi Herningvejimi pisuinnaat aqqutaatigoortilluni biilimit aportilluni siorna ajunaarpoq. Angut 22-nik ukiulik Aasiaat eqqaanneersuusoq iluatsinngitsumik uummarsarneqarsimagaluarpoq.

Apuiffiusup nalaani videokkut immiussat iluaqutigalugit apuisoq sumiissuserneqarpoq, kingornalu 71-inik ukiulik najugaqarfianiittoq politiinit paasineqarpoq. Misissuinermilu biilii saavatigut ajoqusersimasoq paasineqarluni.

Jyllandip qeqqani kitaanilu politiini unnerluussisussaatitaasut allagaq unnerluussut maanna piareeraat, TV MIDTVEST allaaserisaqarpoq.

AAMMA ATUARUK Biilimik apuereerluni qimaasup videoliarineqarnera politiit saqqummersikkaat

Apuisoq arlaleriarluni unioqqutitsisoq
- Apuisoq angallannermut inatsimmik arlaleriarluni - mianersuaalliornikkullu toqutsisimasutut unnerluutigineqartussanngorpoq, Jyllandip qeqqani kitaanilu politiini, eqqartuussissuserisoq, Mette Møller tv-eqarfimmut oqarpoq.

Apuisoq angallannermut inatsimmi paragraffi 118 naapertorlugu unioqqutitsisimasutut aamma unnerluutigineqalerpoq, tassa politiit naapertorlugit apuisoq pisariaqartumik sissuersimanngitsutut, kiisalu pillaasarnermut inatsimmi paragraffi 253 naapertorlugu - apuisoq apuinerup kingorna ikiuunnanilu ikiortissarsiorsimanngimmat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat