Sakkutuujusussaaneq eqquteqquaa

Dansk Folkepartii sinnerlugu Folketingimi ilaasortap, Namminersornerlu pillugu isumalioqatigiissitani ilaasortap Søren Espersenip Kalaallit Nunaanni Savalimmiunilu sakkutuujusussaatitaaneq eqqunneqartariaqartoq piumasaraa.

Danmarkimi sakkutuussarsiornermut tamanna iluaqutaasinnaassammat sakkutuujusussaatitaanerup nunatsinni eqqunneqarnissaa piumasarineqarpoq.

Søren Espersen ima tunngavilersorpoq:

- Kalaallit Nunaat Savalimmiormiusulli namminersortunngornissaa ilimagineqarsinnaammat, sakkutuujusussaatitaanerup eqqunneqarnissaa pissusissamisuuginnarsoraara, Søren Espersen oqarpoq.

Kalaallit nammineq kajumissuserisaminnik sakkutuunngorsinnaapput, 20-nillu ukiullip, Jørgen Hansenip Søren Espersenip siunnersutaa tapersersorpaa. Jørgen Hansen maanna Skive Kaserne-miippoq, sakkutuut naalagaarassaattut ilinniarluni. Joorup oqaasii malillugit sakkutuujuneq inuttut ineriartornartorujussuuvoq:

- Sakkutuujuninni inuttut ineriartornikuuvunga, perornartorujussuuvoq, Jørgen Hansen oqarpoq.

Sakkutuunngorniarneq ilaatigut sakkortusarsinnaavoq, Jooruulli tamanna ajorinngilaa, ilinniagarlu nunatsinni atorneqarsinnaasoq kajumissaarutigalugu:

- Ajorinngilara misilitassaagami. Ilaasa nuannarivaat ilaasa ajorivaat. Nuannarinnittut ingerlaqqiinnartarput, ilaasalu qaammatini sisamani sakkutuujoriarlutik allamut sanguunnartarlutik. Aappaagu januaarimi konstabelitut naammassiguma Irakiliassaanga, qaammatinilu arfinilinni tassaniissallunga, Jørgen Hansen oqarpoq, nangillunilu:

- Ilinniarnera nunatsinni soorunami atorneqarsinnaavoq. Uanga ingeniørregimentimiikkama. Ingeniørregimentimi suliarisartakkavut inuit akornanni atorneqarsinnaapput, konstabelitut, tassa sakkutuut naalagaaraattut ilinniartoq Jørgen Hansen, Nuummeersoq, oqarpoq.