Sakkutuujunngitsut 927-t toqutaasimapput
Israelimiut hizbollah-kkullu ulluni 27-ini akersuunneranni libanonimiut 1000-t sinnerlugit toqutaasimasut Libanonimi peqqinnissamut ministeri taama nalunaarpoq.
Franskit nutaarsiassaqartitsiviat AFP naapertorlugu libanonimiut 927-t sakkutuujunngitsut akersuunnerni toqutaapput takku saniatigut libanonimiut sakkutuui 30-t israelimiullu sakkutuui 50-t toqutaapput.
Israelimiut 94-t akersuunnerni toqutaapput. Hizbollah-kkut ippassaq Israelip tungaanut qaartartunik igeriussisaqattaarmata 15-t toqutaapput. Libanonimiut ippassaq saassussinerat qanoq akeriassanerlugu israelimiut naalakkersuisuisa siulittaasuata, Ehud Olmertip, siunnersortini illersornissamullu ministerini ullaaq ataatsimeeqatiserai. Israelimiut sakkutuuisa ministeriisalu arlallit sakkortunerusumik libanonimiut saassunneqarnissaat noqqaassutigisaqattaaraluaraat ullaaq ataatsimiinnermi taamatut aalajangertoqarsimanngitsoq, nutaarsiassaqartitsivik Assosiated Press tusarliussivoq.
Israelimiut timmisartui sorsunnermi atorneqartartut unnuaq qupillugu Libanonimi qaartartumeerisaqattaarput. Massakkorpiarlu akersuunnerit sakkukillinngivillugit akersuuttoqarpoq.
Israelimut illoqarfeeqqamiit illoqarfeeqqamut ingerlaarlutik innuttaasunik tiguaasaqattaarput. Taamaaliorput namminneq killeqarfimminniit 30 kilometerit angullugit Libanonip ilaani kuussuup Litanip tungaanut hizbollah-kkunnik sakkuinillu piuneerutitsiniarsaralutik. Israelimiulli Libanonip killeqarfiata suli eqqaaniipput anguniagartillu timmisartutik ikiorsiullugit anguniarsaraat.
Ikiuiniaqatigiiffimmi Læger Uden Grænserimi sulisut qanittukkut nalunaarput israelimiut timmisartortartui kuussup Litanip eqqaani qaartartumeerisimasut. Akersuunnerit sakkortoruttormata Læger Uden Grænserini sulisut ikiorsiissutissanik biilerlutik kuussuup eqqaani illoqarfeeqqamut pajunniaraluarlutik pajussinnaasimanngillat.
- Uniinnarusunngilagulli maanna kuussuup illuatungaaniit pisuinnarluta pajunnialersaarpugut. Israelimiulli taamaaliornitsinni illersorsinnaanata kalerreereerput, Læger Uden Grænserimi sulisut ilaat oqarpoq.
Naalagaaffiit Peqatigiit isumannaallisaaniaqatigiivisa akersuunnerit unitsinneqarnissaannut siunnersuusiassartik aqagu naammassissagavaat. Israelimiut sakkutuui Libanonimiitsillugit libanonimiut siunnersuummik akuerserusunnatik nalunaaruteqareerput.
