VIDEO Sakkutuuiarneq Nuummiu: Aliasuttorujussuusinnaasarpunga, kamassimallungalu. Imigassartorujussuunikuullungalu.

Sakkutuut nunanut allanut aallartitaasimasut, tassa sorsuffiusuni sakkutuujusimasut nunatsinniittut 100-t sinnerpaat. Taakkua ilagaat Nuummiu, Jakob Wiechmann, taannami sakkutuutut Kosovomi 2000-mi aallartitaanikuuvoq.
41-nik ukiulik Bornholmimi nammineq kajumissutsiminik ukioq 1999-imi sakkutuunngoqqaarpoq. Kosovomi sakkutuutut 2000-mi ukiup affaanik sivisussuseqartumik aallartitaavoq.
septembarip 21-at 2020 17:06

- Utersaartoorsinnaasarpunga, aliasuttorujussuusinnaasarlungalu kamassimallungalu. Imigassartortorujussuunikuuvunga, piffissamilu sivisuumi atugarinerani imminut sequtsingajannikuullunga. Tamanna sakkortunikuuvoq. 

Taama Nuummiu Jakob Wiechmann sakkutuutut Kosovomi 2000-mi aallartitaanikoq oqarpoq. 

41-nik ukiullip sakkutuutut nunanut allanut sorsuffiusunut aallartitaasimasut marluk Danmarkimeersut sakkutuunik nunanut allanut sorsuffiusunut aallartitaasimasunik nunatsinneersunik ujarlernerat nuannaarutigaa.

Taakku veterancafémik taallugu sakkutuunik nunanut allanut sorsuffiusunut aallartitaasimasunik ataatsimoorfiusinnaasumik pilersitsinikuupput. 

AAMMA ATUARUK VIDEO: Sakkutuuiarnerit nunatsinni 100-t sinneqartut

- Nassuiaasariaqarnani oqaloqatigisinnaallugit nammineq maluginiarnikuuara. Oqaluttuarfigisariaqarnagit, nalunnginnakku aamma taakku assingusumik misigisaqarnikuusut, Jakob Wiechmann oqarpoq. 

Naak taassuma Kosovomi misigisai imaannaasimanngikkaluartut ajunngitsumik kinguneqartut nammineq isumaqarpoq. 

- Oqimaatsunik aalajangiisinnaanissara ullumikkut ersiginngilara. Sakkutuujunerma kingorna tamanna iluaqutigaara, Jakob Wiechmann oqarpoq. 

Jakob Wiechmannip misigisaminik oqaluttuarnera videomi ataani takuuk.

 

knr.gl: Veterancase