Sakkutooqarfiup nutarterneqarneranut nunarput aningaasanik pissarsisariaqarpoq

Thulemi sakkutooqarfiup nutarterneqarneranut atatillugu Danmarkip avammut tunisaminit isertitassaasa ilaannit Nunarput pissarsisariaqarpoq. Taama isumaqarpoq nunanut allanut naalakkersuisunut ilaasortaq Josef Motzfeldt, taassumalu danskit nunanut allanut ministeriat kalerrereersimavaa:

Nunatta elektronikimut atortorissaarutinik ilisimasaqarnera killeqarpoq. Taamaattumik nunanut allanut ministerimut oqaatigereerpara pissusissamisuussasoq; Danmarkip isertitassaasa ilaannik Nunarput pissarsitinneqassappat. Tamanna naammassillugu suli suliarineqanngilaq. Taamaattorli nunanut allanut ministeri Per Stig Møller aasamut maanga tikeraarpat naapisimasussaavara.

Josef Motzfeldt aperineqarami Danmarkip isertitassai suliffeqarfinnut namminersortunut tunniunneqartussaannginnersut akivoq, suliffeqarfiit elektronikimik suliaqartut pissarsisussaassasut. Aammali suliffeqarfiit taakkua sulisuilu akileraarutitigut danskit naalagaaffiannut akiliuteqartussaajumaarput. Taakkununngalu isertitassanut Nunatta pissarseqataanissaa anguniarlugu Per Stig Møller oqaloqatiginiarpara, Josef Motzfeldt oqarpoq.