Sakkutooqarfimmi qullersaq Vancemut akerliliimmat USA-p soraarsikkaa

USA-p Pituffik Space Basemi qullersaa Susannah Meyers soraarsitaavoq.

USA-p illersornissaqarfia taama nalunaaruteqarpoq. Aviisi Berlingske taama allaaserisaqarpoq.

Sakkutooqarfimmi "aqutsisinnaassusaata apeqqusernarnera" tunngavilersuutigineqarpoq.

- Sakkutuut qullersaat sapinngissamik ileqqorissaartussaapput, pingaartumik partiilersuuffiunngitsumik sulissappata, illersornissaqarfik allappoq.

Pituffik Space Base Thule-Basemik taaneqartarnikuuvoq, USA-llu præsidentiata tullia J.D.Vance oqallisigineqaqisumik Pituffik Space Basemut tikeraaqqammerpoq.

Oqariartuutit apeqqusersimagai

Vance nunatsinnut sivikitsumik tikeraarnermini Sisimiuni Avannaata Qimussersuata ingerlanneqarnerani najuuttussaagaluarpoq. Taassuma nunatsinniinnermini Danmarkip nunatsinnut iliuuserisai annikippallaarnerarlugit isornartorsiuivoq.

- Danmarkimut oqaatiginiagarput paatsuugassaanngilaq: Sullissilluarsimanngilasi. Kalaallit Nunaata inui sillimaniarneralu annikippallaamik pivasi. Tamanna allanngussaaq, taanna ilaatigut taama oqarpoq

Amerikamiut illersornissamut immikkoortortaqarfiani oqaaseqartartoq, Sean Parnell, soraarsitsineq pillugu inuit attaveqatigiittarfiani X-imi allappoq.

"Suliakkiunneqartut Trumpimillu piumasarineqartunut apeqqusiisut illersornissamut immikkoortortaqarfimmi akuersaarneqarsinnaanngitsut", taanna allappoq.

Oqaaseqartartup Military.comimi allaaserisaq Pituffik Space Basemi sakkutuunut e-mailikkut nassiunneqarsimasoq innersuuppaa. Tassanilu mailimi Vancep oqariartuutai soraarsitaasup apeqqusersimavai.

- Ullutsinni politikkitut isigineqarnianngikkaluarlunga, amerikap allaffeqarfiata ernumassutai, præsidentip tullersortaanit, J.D. Vancemit oqaatigineqartut Pituffik Space Basemit oqariartuutaanngillat, mailimi taanna allappoq, maililu taanna qallunaanut kalaallinullu sulisunut nassiunneqarsimavoq.

Aqutsilerumanerup kingorna tikeraarneq

Soraarsitaasullu "sakkutooqarfimmi aqutsisuutilluni tamatta ataatsimuussasugut" kissaatigalugu e-mailimi allassimavaa.

Meyers juulimi siorna sakkutooqarfimmi qullersanngorpoq.

Amerikamiut præsidentiata, Donald Trumpip nunarput aqulerumallugu oqariartuuteqartareersorlu Vance tikeraarpoq. Taassumalu sakkutuulersornissaq periarfissatut matussusernagu oqaatigaa.

Pituffik Space Basemi illersornissaqarfik 1952-imi piareerneqarpoq, taamanili USA nunatsinniittuuteqalerpoq.

Engang havde USA tusindvis af soldater på basen. I dag befinder der sig omkring 150 soldater.

USA siuliani tuusintilikkuutaanik sakkutooqarfimmiititsinikuuvoq. Maannalu sakkutuut 150-it missaaniillutik.

Danmarkip USA-llu 1951-imi illersornissamut isumaqatigiissutaanni USA-p nunatsinniisitsinissaa isumaqatigiissutaanikuuvoq.