Sakkutooqarfimmi pisortartaaq: Issittumi sakkutooqarfik nukittunerulissaaq

Issittumi Sakkutooqarfiup nakkutiginninnermut suliai ukiuni aggersuni amerlanerulissapput
februaarip 28-at 2016 13:53

Issittumi Sakkutooqarfimmi sulisut pisortartaartik nutaaq pingasunngormat kiisami tikilluaqqusinnaanngorpaat.

Nuummi sapaatip akunnerata aallartisimalaarnerani silapilunnera pissutaalluni Nuummukartussat amerlasuut Kangerlussuarmi ilaatigut ullualunni sapernupput. Illersornermulli pisortap tullia Issittumilu Sakkutooqarfiup pisortassaa nutaaq Nuummut pingasunngormat tikipput.

Issittumi Sakkutooqarfiup pisortassaa, 53-inik ukiulik Kim Jesper Jørgensen, sakkutooqarfimmi pisortassatut kingorna ivertinneqarpoq.

Qaaqqusanut kingorna ilasseqatigiittoqarpoq, kalaalimernit, nammineq flødeboor'luliat, champagne sodavandillu ilaatigut sassaalliutigineqarlutik.

Issittumi Sakkutooqarfimmi sulisut 40-t tamangajammik uniformilersimapput, tassa sakkutuut timmisartortartut, imarsiortut sakkutuullu nalinginnaasut uniformilersimammata.

Illersornermut pisortap tullia, sakkutuut naalagaasa ilaat Per Ludvigsen aamma uniformilersimavoq. Issittumi Sakkutooqarfimmi aqutsineq, Illersornermut pisortaq sinnerlugu Kim Jesper Jørgensenimut tunniuppaa.

Issittumi Sakkutooqarfimmi pisortatut sulilernissani ataqqinaatitut Kim Jesper Jørgensenip tiguaa:

- Issittup ukiuni makkunani oqallisigineqartorujussuunera, tamaanilu ineriartortitsisoqarniarnera eqqarsaatigalugu Issittumi Sakkutooqarfimmik aqutsisuunissara ataqqinaatitut tiguara, Kim Jesper Jørgensen oqarpoq.

Kim Jepser Jørgensen, Issittoq pillugu suliniaqatigiiffimmi 2014-imili siuttuuvoq. Illersornissaqarfiup Issittumi qanoq ilinikkut akuunerusinnaanera suliniaqatigiiffiup taassuma nalilersortarpaa.

Aamma atuaruk Ministereqarfiup issittoq pillugu nalunaarut kinguartippaa

Kim Jesper Jørgensenili tamanna pillugu annerusumik oqaaseqarusunngilaq, allamik maanna atorfeqarlernini erseqqissaatigalugu.

- Aaqqissuussinermut Kalaallit Nunaat ilaasortaareerpoq, suleqatigiissitanilu ilaaffigerusutamini aamma peqataasarpoq. Taamaammat uani suliniummi sunniuteqaqaqataavoq, Kim Jesper Jørgensen oqarpoq.

Issittup oqallisigineqariartornera pissutigalugu, Issittup siunissami nakkutigineqarnerata illersornissaqarfimmit annerusumik isumagineqarnissaa pilersaarutaavoq. Taamaammat Issittumi Sakkutooqarfik amerlanernik suliassaqarumaartoq, Kim Jesper Jørgensen oqarpoq.

- Issittumi Sakkutooqarfiup siunissami nukittunerulernissaa soorunami naatsorsuutigaara, suliassaqarnerulerlunilu aningaasalersorneqarnerunissaa neriuutigalugu, Issittumi Sakkutooqarfiup pisortartaava Kim Jesper Jørgensen oqarpoq.

Aamma atuaruk Konservativet Issittumut tunngatillugu missingersuutit marloriaatinngortikkusukkaat