Sakkutooqarfik Nunatsinniiginnassanersoq suli qularnaarneqanngilaq

Qularnaarneqanngitsorli tassaavoq sakkutooqqarfik Kalaallit Nunaanniiginnassanersoq.

Danskit naalakkersuinermik suliallit illersornissamut isumaqatigiissutaanni, sapaatsip akunnerata siuliani tamanna aalajangerneqarpoq.

Kalaallit Nunaannili Sakkutuut alapernaarsuisoqarfiata nuunneqarnissaa, maannakkut siornatigullu sakkutuut naalagarisimasaannit tamanna aarlerinartoqartinneqarpoq.

Sakkutuut alapernaarsuisoqarfiisa kattunneqarlutik alapernaarsuisut Kalaallit Nunaanniit nuunneqarnissaa, siornatigut pisortaasimasup, Axel Fiedlerip isumaqatiginngilluinnarpaa. Taamaaliornikkummi Illersornissamut Qullersaqarfiup Nunatsinniititaqartussaanini unioqqutissagaa isumaqarami.

Kalaallit Nunaani alapernaarsuisoqarfiup Nuummut Århusimulluunniit nuunneqarsinnaanera Illersornissamut Qullersaqarfimmit ukiut pingasulli matuma siorna misissorneqarpoq, taamanikkullu aamma Savalimmiuni Nunatsinnilu alapernaarsuiffiit kattullugit, Atlantikup avannaani Alapernaarsuiffimmik pilersitsisoqarnissaa eqqartorneqarpoq. Alapernaarsuisut Danmarkimi qitiusumik aallaaveqalernissaat, Nuummilu minnerusumik immikkoortortaqalernissaa periarfissatut allatut aamma taamani eqqartorneqarpoq.

Eqqarsaatit tamakku saqqummiunneqarmatali alapernaarsuisut pisortaata Nunatsinniiginnarlutik nakkutigisassatik Kangilinnguaniit nakkutigilluarnerusinnaagaat, Illersornissamullu qullersaqarfiup Nunatsinniititaqartariaqarnera, 2007-imi allaaserisamini naqissuserpaa.

- Killeqarfiup iluani alapernaarsuinissamut, ujaasinissamut, annaassiniarnissamut, aalisarnermillu nakkutilliinissamut, pisortat Nunatsinniititaqartariaqarnerannik Kalaallit Nunaata piumasaqaatai, alapernaarsuiffiup Nunatsinniit nuuneratigut akisussaassusilimmik isumagineqarsinnaanersut apeqqusertariaqarpoq, Fiedler taamani ilaatigut allappoq.

Alapernaarsuiffiup Nunatsinniit nuunneqaruni suniuteqapiluttussaanera,

maannakkut Kangilinnguani pisortaasup, Jan Bøestedip nassuerutigaa.

Taanna oqarpoq Kalaallit Nunaanni alapernaarsuisut Nunatsinniiginnarnissaat, Illersornissamut Qullersaqarfimmut siunnersuutigisimallugu. Alapernaarsuisulli immakkut isumannaalisaanermik suliaat, alapernaarsuinerlu ataatsimut isigalugu suliassatik suliarisinnaalluassallugit - alapernaarsuiffik Savalimmiuni Danmarkimiluunniit qitiusumik aallaaveqalissagaluarpata.

Jan Bøestedilli erseqqissarpaa, Nunatsinni, soorlu silamut, sikunut allanullu atatillugu paasissutissat qanimut nakkutigigunikkit iluarnerpaassasoq.