Sakkutooqarfik atorluarneqassaaq

oktobarip 27-at 2006 05:23

Islandimi sakkutooqarfik Keflavik qimanneqareersoq atorneqarani uninngaannassanngilaq. Suliniaqatigiiffiup nutaap tamanna isumagisussanngorpaa, islandimiut aviisianni, Fréttabladimi, taama allaaserinnittoqarpoq.

Suliniaqatigiiffik marlunngormat pilersinneqarpoq, sakkutooqarfiusimasullu ineriartortinneqarnissaa sulissutigissallugu. Tassami sakkutooqarfiusimasup illutaasa qimaannarneqarsimasut inuussutissarsiornermut atorneqarnissaat, aningaasarsiornikkullu ineriartortitsisoqarnissaa, siunniunneqarpoq.

Suliniaqatigiiffik naalagaaffimmit 17 millioni koruuninik aningaasaliiffigineqarsimavoq, nunallu mingutsinneqarsimasup salinneqarnissaa, illutaasalu nutarterneqarnissaat, siullermik isumagineqassapput.