Sakkussiarsuit ikilisarneqarnissaat isumaqatigiissutigaat

Nunarsuup atomimik qaartartorsuaqanngitsup anguniarneranut amerikamiut præsidentiata takorluugaanut alloriarnerup siulliup malunnartinniarneranut Tjekiap illoqarfiisa pingaarnersaanni Pragimi illussaarsuaq tusaamasaq nalliuttorsiualaarnermi pingaartorsiornartumi katersuuffigineqarpoq.

Pragimi illussaarsuup inersuanut præsidentit Obama aamma Medvedev isermata, qarlortartut oqaluttuarisaanermi pisoqaraluttuartoq nalunaarniarpaat. Atsioqatigiinnertaa ingerlanneqarasuarpoq. Isiginnaartullu ersartaannerat ilutigalugu kissalaartumik assammittoqarpoq, Ruslandimmi aamma USA-p sakkussiarsuarnik pigisinnaasamik amerlassusissaat 30 procentimik ikilisarniarmatigik. Taamaalilluni atomimik qaartartorsuit nunat pigisinnaasaat 1550-inut killilerneqarput. Præsident Obamallu oqaluttarfimmiit susoqarniarnera nalunaaqqaarpaa.

- Sillimaniarnermut aamma atomimik sakkussiarsuit siammarterneqannginnissaannut atatillugu aammalumi Ruslandip USA-llu akornanni pissutsinut pisoq oqaluttuarisaanermut pingaaruteqartoq Obamap oqaatigaa.

Medvedevilumi aamma ajornerujumanngilaq.

- Isumaqatigiissut una nunarsuarmi eqqissisimanerulernermik pilersitsissaaq, Ruslandip præsidentia oqarpoq.

Nunarsuaq atomimik qaartartorsuaqanngitsoq pillugu takorluukkani præsident Obamap ukioq ataasingajak qaanngiuttoq Pragimi saqqummiuteqqaarpaa. Taamanilu oqalugiaatiginikuusani Nobelip eqqissinissaq pillugu nersornaasiuttagaata siorna imminerminut tunniunneqarneranut tunngaviulluinnartoq arlaleriarluni ullumi unnersuussiffigisarpaa. Takorluukkalli piviusunngortinnissaanut suli suliassarpassuaqartoq præsidentip nassuerutigaa, ullumili ajunngitsumik aalloriartoqartoq isumaqarluni.

Sakkussakillisaanissamut isumaqatigiissut atuuttunngortinneqarsinnaavoq aatsaat amerikami aamma Ruslandimi inatsisartunit akuersissutigineqareerpat.