Sakkulersuunnerit ukiuni kianneruffiusuni amerlisarput
Ajornartorsiutit tunngaviulluinnartut sakkulersuunnernut pissutaakkajuttarput, assersuutigalugu nerisassaqarniarneq ajornarsigaangat sakkulersuunnerusoqalertarluni. Danmarkip Radioata nittartagaani tamanna atuarneqarsinnaavoq.
- Nunalerinermi katersukkat ukiuni kianneruffiusuni ikinnerusarput. Gradip affaannaanilluunniit kiannerulerpat katersat ikilisarput, sakkulersuunnerillu taamaaligaangat amerlisinnaasarlutik, ilisimatuut qullersaat Marshall Burke tuluit nutaarsiassaqartitsiviannut BBC-mut oqarpoq.
Nunat inoqajuitsup Saharap kujataaniittut ilisimatuunit 1981-imiit 2002 tikillugu alaatsinaanneqarsimapput, qanoq kiatsigisarnerat nalunaarsorneqartarsimalluni. Ilisimatuut Californiameersuupput, Berkeleyp Universitetianeersuullutik.
Sudanimi nunap immikkoortuani Darfurimi ukiuni kingullerni akersuunnerit assersuutitut taaneqarput. Naalagaaffiit Peqatigiit naapertorlugit inuit 200.000-it sinnerlugit Darfurimi akersuunnerni toqutaasimapput.
Afrikami kiannerulissappat akersuunnerit amerlinissaat ilisimatuut aarleqqutigaat. Eqqoriaanerimmi naapertorlugit silap pissusaata allanngoriartornera malunnarsigaluttuinnartussaavoq.