Sakkulerlutik Qaqortumi ujajaasut

Angutit inuusuttut marluk Qaqortumi niuertarfimmi Spar-imi Nipingaamiittumi ujajaasut Qaqortumi politiinit ujaarineqarput. Ujajaaneq ippassaani pingasunngornermiunnukkut qulit qaangerlugu tanneq pingasunut pivoq.
Allattoq Jaaku Lyberth
novembarip 16-at 2012 06:11

Angutit inuusuttut marluk ujajaanerminni kaataq savillu niuertarfimmi pisiniartitsisumut qunusaarutitut atorpaat, niuertarfiullu karsianiittut aningaasat tilllineqarlutik Qaqortumi poliitiit oqaluttuarput.

Angutit ujajaasut aappaa, 15-it 20-illu akornanni ukioqassangatinneqarpoq, 165-it 170 centemeterisut angitigaluni, qernertumik qarleqarpoq aamma qernertumik jakkeqarluni nasartalimmik. Kiinnani annoraaminermik qernertumik assersimavaa, kamippaat træningskuut qasertut taartut atorpaai, taakkua qaqortumik titarnermik ilisarnaateqarput. Angutip inuusuttup taassuma ujajaanermini kaataq qunusaarutigaa.

Angutip inuusuttup aappaa, 15-it 20-illu missaannik ukioqassangatinneqarpoq, taanna angineruvoq 170 175 centemeterisut angitigaluni, ukiorsiutinik qarlippaaqarpoq qorsorpaluttunik qalipaateqartunik, taassuma kavaajaq nasartalik qaqortunik orange-anik tungujortunillu taartunik qalipaateqarpoq, taartunik kamippaqarluni.
Ujajaanermut atatillugu takunissimasinnaasut ilisimannittuulluunniit Qaqortumi politiinut attaveqaqquneqarput, Qaqortumi politiit oqaarasuaataata normoraat 64 22 22 Qaqortumi politiit allaffiat ullaakkut arfineq pingasuniit ualikkut sisamat tungaanut ammsarpoq, aamma oqarasuaat angallatagaq attavigineqarsinnaavoq taanna normoqarpoq 49 41 22.