Sakkuaattartut islamisiortut Mogadishumit aniapput

Sakkuaattartut islamisiortut Somaliap illoqarfiisa pingaarnersaanit eqqisiviilliorfioqisumiilu Mogadishumiit unnuap ingerlanerani aniasimapput. Taama isiginnissimasut aviisimut New York Times-imut oqaluttuarput.

Somaliap naalagaaffiata sakkutuui Ethiopiamiut peqasiullugit illoqarfik apuuffiginialeraallu taama pisoqarpoq.

Ethiopiamiut naalagaaffiullu sakkutuui illoqarfimmut apuuppata aassunneqisumik sakkuaatilernissaat ernummatigineqarsimagaluarpoq. Islamisiortummi sakkuaattartuisa nungunneqarnissami tungaanut akersuunnissartik aarlerisaarutigisimagaluarpaat.

Taamaattumik tupaallaatigineqaqaaq Mogadishup timmisartoqarfiata tungaanut, illoqarfiullu tungaanut aqquserngit assersorneqarsimasut maanna inuerussimammata. Sakkuaattartut inuusuttuaqqat aqqusinernik assersuinermi paarsisuusimasut uniformitik peeriarlugit sakkutik toqqortitersimavaat inuinnarnullu akulerussuullutik, New York Times allappoq.

Ikiuiniaqatigiiffiit FN-illu aaqqiagiinnginneq Afrika-p kangimut isuani pisoq annertuumik sivisuumillu sorsuutivinnissamik kinguneqarsinnaanera ulluni kingullerni aarlerisaarutigisimavaat, taamaattoqassappammi inuiaat atugarlioreeqisut suli atugarliornerulernerinik kinguneqassammat.

Islamisiortut Mogadishumiit qimagunnerat eqqissinermik kinguneqassanersoq, imaluunniit sivisuumik isertortumik sorsuttoqalernersoq kialluunniit oqaatigisinnaanngilaa.

Somaliamilu pisunik ilisimannittut isertortumik sorsuttoqarnissaa ernummatigaat, taamatummi pisoqassappat peqqarniisaarniat nunanit allaneersut imminoriaatigalutik qaartitsisartut aammalu aqqusinerni qaartartumeerisartut – Irak-imisorluinnaq - imaaginnalivinnissaat aarleqqutigineqarmat.