Sakkuaakkunnaarneq Kofi Annanip oqiliallaatigaa

Israelip Hizbollah-kullu sakkuaakkunnaarneranniit ulloq unnuarlu maanna qaangiussimalerput, pisullu ataasiakkaannguit eqqaassanngikkaanni, sakkuaakkunnaarneq immaqa patanarsinnaagaluarluni ingerlaannassagunarpoq. Naalagaaffiit Peqatigiit qullersaat, Kofi Annan, oqarpoq, sakkuaannerit unitsinneqarnerat assut oqiliallaatigigini, sakkuaakkunnaarnerlu illuatungeriinnit ataqqineqarunarluinnartoq unnerlugu.

Sakkutuut naalagaat franskit Naalagaaffiit Peqatigiit New Yorkimi qullersaqarfiannut maanna ingerlaarput, Naalagaaffiit Peqatigiit sakkutuuisa, eqqissisimanissamik nakkutiginnittut, sumut inissinneqarnissaat pilersaarusioriartorlugu. Sakkutuut taakku libanonimiut Libanonip kujasissuani sakkutuuinik nakkutiginnittunik tapersersuinissaat pilersaarutaavoq. Naalagaaffiit Peqatigiit sakkutuuisa, eqqissisimanissamik nakkutilliisussat, suliassaasa peqqissaartumik piareersarluarsimasumillu pilersaarusiorfigineqarnerat aqaguagu sisamanngorpat naammassereersimassasoq isumaqatigiissutaarerpoq.