Sakkuaakkunnaaqqusineq itigartippaat
Akunnerni 72-ini sakkuaakkunnaarnissamik Nalagaaffiit peqatigiinnit siunnersuutigineqartoq Israelimiunit akuerineqanngilaq. Sakkuaakkunnaarnissamik siunnersuutip qulakkeertussaagaluarpaa utoqqaat ikilikkallu sorsuffiusumik anninneqarsinnaanerat.
Akunnerni 72-ni sakkuaakkunnaarallarnissaq pisariaqanngilaq tassami Libanonimiit avammullu ikiuniarluni aqqutigineqarsinnaasoq ammarneqareerpoq Israelimi naalakkersuisut oqaaseqartartuat Avi Pazner, oqarpoq nangillunilu Israelimiut ikiuiniartunik ajoqusersuinngitsut kisiannili Hizbollah tassaasut nakorsaatiinik nerisassanillu Libanon-ip kujataanut apuutsaalisitsisut, taamaaliornermikkullu Israelimik pisuutitsiniartut.
Naalagaaffiit Peqatigiit ikiuiniarnermut pisortaa Jan Egeland sakkuaakkunnaarnissamut siunnersuuteqartoq arfininngormat oqarpoq sakkutuujunngitsunut ikiuiniarneq qularineqarsimagaluaqisoq kisiannili ataasiarani iluatsittarsimasoq, taamaattumillu neriuutigineqarsinnaasoq sakkuaakkunnaarnerup piviusunngortinnissaa.
Imaanngilaq Hizbollah kisimi sakkuaakkunnarnissamik ajornartorsiortitsisoq, tassami Israel siusinnerusukkut sakkuaakkunnaarnissamut akuersaartarsimanngilaq. Egeland oqarpoq, nangillunilu:
Aporfissaq annerpaaq tassaavoq illuatungeriit oqaloqatigiilersinnissaat, tassami imminnut tatiginngilluinnarput, Israel, Libanon Hizbollahlu saaffigisariaqarpavut taamaalillunilu sakkuaakkunnaarneq periarfissanngorsinnaammat, massakkummi kikkulluunniit takusinnaavaat meeqqat amerlanerusut sakkutuuniit inuunerminnik akiliimmata.
Nunani tamalaani ikiuiniaqatigiiffiit tallimanngormat maalaarutigaat ikiuiniarluni aqqut israelimiut sakkutuuinit soqutigineqanngimmat timmisartunillu saassunneqartarluni.
