Sakkortunerusumik saassussiniartoqarsimagunaraluarpoq

Danmarkip Pakistanimi aallartitaqarfiata qaartartumeerneqarneranut atatillugu annertunerusumik saassussisoqarnissaa pileraarutaasimagunarpoq. Nutaarsiassaqartitsiviup al-Jazeerap tuluttut nittartagaani taama allaaserinnittoqarpoq.
Allattoq Mads Lynge
juunip 03-at 2008 17:40

Biilit qaartinneqarmata inuit ikinnerpaamik arfineq-marluk toqutaapput, arlalippassuillu ikilerneqarlutik, qaartartumeerisullu tigusarineqarnissaat ilimanarsigaluttuinnartoq oqaatigineqarpoq.

Biilit qaartinneqartut naalagaaffiit aallartitaasa biiliisut biilit normuisa allagartaannik pilersorneqarsimapput, biilillu allat marluk aamma taamatut normulersorneqarsimasut nassaarineqartut Danmarkip Nunanut allanut ministereqarfianit nalunaarutigineqarluni.

Saassussineq annertunerusoq pilersaarutigineqarsimaneranik tamanna takussutissaasoq, Al-Jazeerap tusagassiortua oqarpoq.

Qaartartumeerinermut atatillugu tigusaasimasoqarnersoq suli nalunarallartoq al-Jazeeramit oqaatigineqarpoq.

Politiit kilitsissiaqarfianneersut Illersornissamullu qullersaqarfiup paasiniaasartuineersut Pakistaniliartinneqarput, Danmarkip nunanut allanut ministereqarfianeersut misissuiartortinneqaramik. Pakistanimiut politiivisa ikiortigalugit misissuisoqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq