Sakkortunerpaanik malitassaqassapput
Nunarsuatsinni uuliasiortunut piumasaqaatit sakkortunersaat Nordsømi malinneqarput, taakkualu nunatsinni uuliasiortussat malittussaagaat, Aatsitassaqarnermut pisortaqarfimmi pisortap Jørn Skov Nielsenip oqaatigaa.
- Nordsømi sulisunut malittarisassat sakkortunerujussuat nunani allani uuliasiorfinni sulisimasut Nordsømut suliartoraangamik tupaallaatigisaqaat, Maarmorilimmi igasoq Herbert Weiss-Ravn, ukiup arfineq-pingajuat qiteqqullugu Nordsømi igasutut sulisarsimasoq oqarpoq.
- Taamaammat Mexicop Kangerliumarngani uuliasiorfiup seerinerujussua pinngortitamik mingutsitseqisoq tusaaginnarlugu nunatta namminersulivinnissaanut sillimmatitta uuliasiornerup ingerlanneqalersup ernumaammernarnera misiginngitsoorunanngilarput. Ernummatissaqanngitsugulli Jørn Skov Nielsen erseqqissaavoq.
Nunarsuarmi avatangiisinut sillimaniarnermullu piumasaqaatit sakkortunersaannik nunarput piumasaqaateqartussaavoq, qinnuteqartullu 17-it taakkunannga malinniinnarnatik aamma susoqariataassagaluarpat iliuuseqarnissaminnut akissaqarluartuunertik uppernarsarsinnaasussaavaat. Iliuuserisinnaasatillu piviusorsiortut uppernartullu saqqummiussinnaasussaallugit.
- Toqqarneqartussattaaq uppernarsartussaavaat sumiiffinni tikikkuminaatsuni ilungersunartunilu uuliasiornissamut sungiusimasaqarluartuunissartik, Jørn Skov Nielsen oqarpoq.
Tusarniaanerit akissutaat massakkut suliarineqaleruttorput taakkualu naammassippata Naalakkersuisut aalajangiiffigisussaavaat uuliasiorfissani 14-ini kikkut uuliasiortinneqassanersut.
