Sakialluttoqarnersoq paasinialerpaat

Kujataani nunaqarfinni najugallit sakiallunnersut paasiniarniarlugu, peqqinnissaqarfik umiarsuarmik kujataanukartitsiniarpoq.

Sakialluttoqarsinnaanerannut misissuutit umiarsuup nassatarissavai.

Meeqqat napparsimavinngikkaluarlutik sakiallunnermik eqqugaasimasut 17 procentiusut, qanittukkut misissuisoqarmat paasinarsivoq.

Umiarsuarli kujataanut apuuppat inuit tamarmik misissortinnissaat pingaaruteqartoq, Dronning Ingridip Napparsimmavissuani medecin-imut tunngaasunut immikkoortortaqarfimmi nakorsaaneq Karen Ladefoged oqarpoq:

- Meeqqat akornanni nappaammik tuniluuttoqartarnera qaqutigoortorujussuuvoq. Inersimasut meeqqanik tunillaassuisarsimassapput, Karen Ladefoged oqarpoq, nangipporlu:

- Inersimasut akornanni inoqarsimassaaq sakialluttunik, suli paasineqanngitsunik, taakkuuppullu nassaarisassagut. Katsorsarniassavagut, taamaalillutalu tunillaassuineq unitsissinnaassallutigu, Karen Ladefoged oqarpoq.

Kalaallit Nunaanni sakiallunnermik nappaateqarneq pillugu peqqinnissaqarfimmi marlunngornermi isumasioqatigiittoqarpoq.