Sajuppillatsitsisarluni misissuinerit qilalukkanik qernertanik ajoqusiisinnaapput
Immalli iluani qaartitseqattaarnerit nipiliortaqisut pillugit, arfernik ilisimasallit mianersoqqusipput, taakku ilagalugu Arfanniarnermut Ataatsimiititaliarsuarmi Danmarki sinnersorlugu ilaasortaq, Birgith Sloth.
- Qilalukkat ingerlaartarfissuisa qiterpiaani aamma neriarfigisartagaanni, Shell qaartitseqattaalerpat, qilalukkat qassit tamassuminnga toqquteqassanersut nalugaluarlutigit taamaattoq ilisimariikkavut eqqarsaatigalugit, qilalukkat ilaat pinngitsooratik akornuserujussuanngikkunik toqusussaassapput, Birgith Slot mianersoqqussivoq.
Aamma Nunatsinni arfernik misissuinermik ilisimatuup, Pinngortitaleriffimmilu atorfeqartup, Mads Peter Heide-Jørgenseni mianersoqqusivoq. Taassuma eqqaamaqquaa, 2009-mi 2010-milu immap iluani qaartitseqattaarluni misissuinerni, qilalukkat 200-it pallillugit toqunikuummatta.
- Qaartitseqattaarnerit nalaani qilalukkat mianersuunneqartussaapput aamma sumiissusersineqaqqaartartussaallutik, kisianni tassa Shell taamaaliorusussimanngilaq, tamannalu ajuusaarnarpoq, Mads Peter Heide-Jørgensen aviisimut Metroexpressimut oqarpoq.
Shellip misissuinissaat, Nunatta Danmarkillu politikeriinit, augustip ingerlanerani aalajangiiffigineqarlutik pinngitsoortinneqarnissaat, Greenpeace-mit neriuutigineqarpoq.
Nunatsinni uuliasiortoqannginnissaanik mianersoqqusisunut ilaapput, EU-p Avatangiisit pillugit ataatsimiititaliaa aamma franskit uuliasioqatigiiffiat, Total.
