Sajuppillatsitsilluni misissuisoqarnissaa ernumagineqarpoq

Canadami ujarassiuutut misissuisarfik, Akilinermi Nunavuup kangisinnerusortaani Sullualummi, nalunaaquttap akunnerinik 600-nik sivisussusilimmik immap naqqani sajuppillatsitsisarluni aasaru misissuinissamut akuerineqarpoq. Taamatut misissuinissaq Nunavummi naggueqatigiit Inuit ilaannit akerlerineqaraluartoq akuerineqarpoq, taamaattorli misissuinerit aallartitsinnagit misissuisussat, Inunnik tamaani najugalinnik ataatsimeeqateqaqqullugit kajumissaarneqarput.

Sullualuk Nunavummi uumasoqarnerpaat ilaattut isigineqartarpoq, 10.000-ilikkaanik timmiaqarami, assigiinngitsorpassuarnik puiseqarluni, qilalugaqarluni qaqortanik qernertanillu assigiinngitsunillu aalisagaqarlunilu arfeqarami. Canadami aviisimi Toronto Starimi allaaserineqarpoq, immap naqqani sajuppillatsitsisarluni misissuinikkut nipiliornernit uumasut akornuserneqarnissaat, naggueqatigiinnit Inunnit assut ernummatigineqartoq.

Immap naqqanik sajuppillatsitsisarluni misissuisoqarnerata nalaani, uumasut ataatsimoortut amerlanaarlutik takkukkaangata tamaaniinnerini, sajuppillatsitsisarluni misissuinerit unitsikkallarneqartassapput.

Canadami avatangiisinut ministeri Jim Prentice oqarpoq, nunap ilaata tamassuma eqqissisimatitanngortinneqannginnerani, uuliaqarlunilu gasseqarsinnaanerata paasinissaa pingaaruteqartoq.

Marianne Stenbækip Canadamit taama tusarliivoq.