Sailing The Arctic Race Nuummut aqqusaassaaq

Sukkaniunnermi Sailing The Arctic Racemi peqataasussat New Yorkimit 2017-imi juulip qaammataani avalassapput, Canadamilu British Columbiami Victoriami ukioq taanna oktobarimi tikittussatut naatsorsuutigineqarlutik.

Tassa sukkaniunnermi peqataasussat New Yorkimit aallartissapput. Taava Canadami Nova Scotiami Halifaximi siullermik tikissapput, Nuummullu kingorna ingerlaassallutik.

Taamaalereerpat Sullualukkuussapput, Eqaluttuutsiaq aqqusaariarlugu Alaska avannaqqullugu qeqertat Aleutit tikissallugit, illoqarfeeqqamilu Dutch Harborimi umiarsualivississallutik.
Taava Canadamut ingerlaqqissapput sukkaniunnerup naammassineqarnissaanut Victoriamut British Columbiamiittumut tamatumuuna anngutissallutik.

Septembarip qaammataani Sullualukkuussapput

Sailing The Arctic Racemik taallugu sukkaniunneq 14.000 kilometerit missaannik isorartussuseqarpoq, septembarilu sikukinnerpaafiummat Canadami oqartussat kajumissaarutigaat sukkaniuttut piffissap taamaalinerani Sullualukkuussasut.

Sukkaniunnermi peqataasut angallataat tamarmik assigiissapput, inuttallu angallamik ingerlassinermik pikkorissusaat suleqatigiilluarsinnaassusiat matumani pingaarnerpaassalluni. New Yorkimit British Columbiap tungaanut sukkaniunnermik aaqqissuisoq Eric Mplnar taama oqarpoq, nangillunilu:

- Imaannaanngilaq. Taama pilersaarusiorsinnaasariaqanngikkaluarpugut, silalli pissusaata allanngoriartornerata kingunerisaanik taamaaliorsinnaanngorpugut, Eric Mplnar, Canadamiu Belgiamit kingoqqisoq Alaska Dispatchimut oqarpoq.

Sukkaniunnermi peqataasut angallataat pisariaqassappat iluarsartuunneqarsinnaanissaat pillugu angallatinik passussivik angallattagaq illoqarfiit nunaqarfiillu tikitassaanniittassaaq.