Saffiugassat Kalaallit Nunaanneersut ussassaarutigineqarnerullutillu tuniniarneqarnerusariaqarput
-Kalaallit Nunaanni aatsitassarsiortuni annersaagatta taamaaliorpugut, tassami kuultimut, saffiugassanullu allanut Kalaallit Nunaanneersunut, soorlu nikkilimut, kangussammut platinimullu, kikkulluunniit aningaasaleerusuttut killiffitsinnik oqaluttuukkusuppavut, NunaMineralsimi pisortaq, Ole Christiansen, oqarpoq.
Piginneqatigiiffik NunaMinerals ataatsimiititsinissaminut piareersarluarsimagunaqaaq.
-NunaMineralsip nammineq pisortai ataatsimiinnermi najuutissapput, tuniniaanerup ineriartornera aamma NunaMineralsip siunissami pilersaarutai oqaluttuarissallugit. Ujarassiuut seniorit aamma ataatsimeeqataassapput, apeqqutinullu akinissaminnut piareersimassallutik, Ole Christiansen oqarpoq.
NunaMinerals piginneqatigiissutinik nalilersuisartuni Dansk AMP-mi nalunaarsorneqarerpoq, NunaMineralsilli anguniagaa tassaavoq nunat assigiingitsut akornanni nalunaarsorneqarnissani.
