Saffiugassanik qaqutigoortunik pinnaanneq aallartippoq

Nunani suliffissuaqarfiusuni saffiugassat qaqutigoortut piumaneqartorujussuupput. Saffiugassanik qaqutigoortunik taaneqartartut Japanimi teknologimut atortut tunisassiornermi piumaneqartorujussuupput.

Maannakkulli niuffaffinni pissutsit allanngulerunarput. Japanimiut ilisimatuut imaannaanngilluinnartumik nassaarsimanerarneqarput, Manerassuullu naqqani sumiiffinni assigiinngitsuni saffiugassanik qaqutigoortunik ulikkaarnerarlugu, atuagassiaq  Nature Geoscience allappoq.

Nunarsuarmi nunat suliffissuaqarfiusut Kina allatut ajornartumik ullumikkut isumalluutigisariaqartarpaat, tassami saffiugassanik qaqutigoortunik tunisassiornerup 97 procentia Kinamiimmat. Tamaannalu Japanimut ukioq kingulleq malunniuteqarluarpoq, aalisagalerngusaanneq pissutaalluni Kinap saffiugassanik taakkuninnga piumaneqaqisunik Japanimut nioqquteqarnini tassanngaannartumik unitsimmagu.

Taama akunnattooruteqarneq Japanimut iluaqutaasinnaavoq. Saffiugassanik qaqutigoortunik  annertuumik nassaarneq manerassuup avannaatungaani kujammullu kangiatungaani pivoq. Aamma nassaarfiit nunat sanilerisat killeqarfiinut ungaseqisumi imaannarmiipput.

Saffiugassat qaqutigoortut pillugit annertunersumik ilisimatusarnissaq aallartisarniarlugu Japanimi naalakkersuisut 5 milliardi koruunit sinnerlugit tapiissuteqarput. Pilersaarusiami ilaatigut pisuussutinik immap naqqaniit qalluinissamut periarfissat misissorneqassapput, elektronikkinullu atortut atorneqareeraangamik igiinnarneqarneranni akui saffiugassat qaqutigoortut atoqqinneqarsinnaanersut aamma misissorneqassapput.

Nunarsuami niuerneq qiviaraanni taama annertutigisumik aningaasaliissoqarnera pisariaqarluinnarpoq. Australiap kippasissortaani aatsitassarsiorfimmi Mount Weld-imi saffiugassat qaqutigoortut arfineq marluk 2007-imi kiilumut 60 koruuneqarput. Pisuussutit piiarneqarnerminni nungukkiartorneri ilutigalugit piumaneqarnerat aallaavigalugit akiat maanna kiilumut 1.066 kr-nut qaffappoq.

Saffiugassanik qaqutigoortunik nassaassaqarfiunerpaanut ilaapput Kalaallit Nunaat, Ruslandi, Australia, Malaysia, Brasilia, India aamma Sydafrika.