Saddam Husseinip Iran nunanit killernit ersiginerusimavaa

Irakip kisermaassilluni naalakkersuisorisimasaata, Saddam Husseinip, sakkutigut sanngiissutsi akeravissuarminit Iranimit paasineqassasoralugu, FN-imit USA-millu sakkulersorfigineqarnissamit ernumaginerusimavaa.
Allattoq Jens Thorin
juulip 02-at 2009 07:14

Taamaammat Irak inuppassuarnik toqoraataasinnaasunik sakkoqarnerarneqartalermat Hussein nassuitsumik pissusilersunngitsoq, Saddam Husseinimik killisiuinernit allattukkat, FBI-ip ippassaq saqqummersitaasa takutippaat.

Kisermaassilluni naalakkersuisup uukapaatitsinersua ilisimaneqartutut 2003-mi sorsunnermik kinguneqarpoq, taamani USA-p sakkutuuisa Irak isaaffigimmassuk. Saddam Husseinilli taamaalinerani isumakuluutiginerusimavaa, akuutissanik akulinnik sakkuuteqannginnini Iranimit paasineqarnissaa.

Irakip sakkukinnera Iranip paasiguniuk saassussissasoq, Husseinip taamani aarleqqutigaa. Taamaammat Nunarsuup sinneranut uukapaatitsisoq, amerikamiut saqqummersitaata takutippaat.

USA-p sakkutuuisa Irakimut isaanerisa kinguneranik Saddam Hussein peersinneqarpoq. Angutinik nukappiaqqanillu shiamusliminik 148-nik 1982-imi toqotsisimasutut decembarimi 2006-imi toqutassanngortitaalluni eqqartuussaaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq