Saddam Husseinip eqqartuussaanera nangeqqippoq

Irakimi præsidentiusimasoq, Saddam Hussein, pinngitsuunerartuarsinnarpoq. Husseinip inunnik naalliutsitsisimasutut toqoraasimasutullu eqqartuussaanera sapaatip-akunnerini pingasuni uninngareerluni ullumi aallarteqqippoq.

Unnerluussutaasut eqqartuussisuunerup atuarpai.

Shia-musliimit 148-t naalliutsillugit 1980-ikkut ingerlaneranni toqorartissimavai, meeqqanut allaat toqumut pillagaatittarsimallugit.

- Pisuutitsinerit akuersaassanerlugit akuersaassannginnerlugilluunniit naluara, Irakimi præsidentiusimasoq, eqqartuussaaqatini arfineq-marluk peqatigalugit eqqartuussivimmiittoq, oqarpoq.

- Naalagaaffimmi oqartussaanerpaaq inatsisitigut illersugaasarpoq, taamaammat pisuutitsineq akisinnaanngilara, Saddam Hussein nangilluni oqarpoq.

Eqqartuussisuunerulli Rahmanip Saddam Husseinip imminut illersornera pinngitsuunerarneralu maluginiarpai, ilaatigulli oqarfigalugu: - Naalagaaffimmi aqutsisuusimavutit, maannali eqqartuussivimmiipputit, allatuulli pineqaatissinneqartariaqarputit.

- Irakip præsidentia taama pineqassanngilaq, Saddam Hussein kamaqaluni akivoq.