Saddam Hussein amerikamiut sakkutuuinut ukiut pingasut akersuutereerluni tunniutiinnartoq, Irakimi inuiannik nungusaaniarsimasutut eqqartuunneqarnermini pisuutinneqassaguni nivinngarlugu maanna toqutassanngorataannaavoq.
Irakimi sakkutuut ilungersuareeqisut perulluliortoqassasoralugu ullumi sillimatinneqalerput.
- Sakkutuut tamarmik sulinngiffeqaqqusaajunnaarlutik sillimatinneqarput. Perulluliortoqaratarsinnaanera sillimaffigaarput, Irakimi illersornissamut ministereqarfimmi oqaaseqartartoq taama oqarpoq.
Eqqartuussineq toqqaannartumik TV-kkut aallakaatinneqarmat takuneqarsinnaavoq, Saddam suleqataarusunngitsoq. Neriumajunnaartarpoq, amerikamiut ikiorniarlugit eqqartuussisuusaartoqartoq oqartarpoq, kiisalu isumaqatigeereerluni eqqartuussisoqartoq oqartarluni.
Amerikami inatsisartunut qinersinissap qiterpaarnissaa ullunik marlunnik sioqqutitsiarlugu Saddam pineqaatissinneqassappat, USA-mi præsidentip illorsuanut kusassaataassaqisoq ilimagineqarpoq.