Saddam Hussein sumiinnersoq nalornisigineqaleraluartoq
Irakip præsidenterisimasaa, toqumullu pillagaasimasoq Saddam Hussein, pillakkatut toqutaasussanngorlugu Irakimi oqartussanut tunniunneqarsimanngitsoq, atorfilittat amerikamiut ilaat ilisimatitsivoq.
- Saddam Hussein amerikamiunit suli tigummineqarpoq, franskit nutaarsiassaqartitsiviannut AFP-mut oqarpoq.
Saddamip illersuisua siornatigut akerlianik oqarsimagaluarpoq.
- Præsident Saddam Hussein Irakip oqartussaasuinut tunniunneqarsimasoq amerikamiut uagutsinnut taama ilisimatitsipput, illersuisoq oqarsimaneragaavoq.
Paatsunganarsinnaasullu tamaanga killeqanngillat. Irakimiut qaffasissumik atorfilittaasa ilaat oqarsimaneragaavoq Saddam pillakkatut nivinngarneqarluni toqunneqarnissaa akunnialunnguit qaangiuppata pisinnaasoq, immaqalu unnummut toqunneqarumaartussarluunniit oqaatigalugu.
Saddam Husseinip pillakkatut toqunneqarnissaa qaqugorpiaq pissanersoq ullup ilarujussuani nalornissutigineqarsimavoq.
