Saddam Hussein al-Qaedamut atassuteqarneq ajorsimavoq
Pentagonimi Amerikamiut illersornissamut ministeeriaqarfiata nalunaarusiaata suliarilluaqqissaakkap maanna uppernarsarlugu avammut tusarliuppaa Irakkimi kisermaassilluni naalakkersuisuusimasoq Saddam Hussein pinerliiniaqatigiillu Al Qaedakkut toqqaannartumik imminnut atassuteqarfigeqatigiittarsimannginnerat.
Amerikamiut Irak sakkutuulermassuk Præsident Bush taama pasilliuteqaqqaarsimagaluarpoq.
Irakkimi sorsunnerup aallartinneraniit ukiut tallimat qaangiuttullu nalunaarusiaq aatsaat saqqummiunneqarpoq. Suliarineranilu Irakkimiit pisortatigoortumik uppernarsaatissat 600.000-t misissoqqissaarneqarsimapput kiisalu Saddam Husseinimut suleqataasarsimasut tusindtilikkaat tusarniaavigineqartarsimallutik.
- Nalunaarusiami uppernarsarneqarpoq Saddam Husseinip al-Qaedakkullu akornanni attaveqartoqarsimaneranik sunnguamilluunniit uppernarsaatissaqanngitsoq, taama nalunaarusiami ilaatigut allassimasoqarpoq.
Siusinnerusukkut nalunaarusiarineqartartut aamma taamatupajaaq inerneqartareersimapput, massakkulli nalunaarusiamut uunga saqqummersumut sanilliullugit paasissutissat katersorneqarsimasut ikkannerusarsimallutik.
Præsident Bush taassumalu tullersortaa Dick Cheney qaffasissumillu atorfillit naalagaaffiup pisortaqarfianeersut pasilliuteqaqqaarsimagaluarput Saddam Hussein Al-Qaeda-kkullu arlaatigut pinngitsooratik atassuteqarfigiittarsimanissaannik.
