Saattuni taarsigassarsiallit INI-mit takusassiarineqarnertik kusanaageqaat

Boligstøtte aqqutigalugu aningaasanik taarsigassarsiallit Saattuniittut Inissiaatileqatigiit INI-p iliuusaa assut kusanaagaat.
juunip 23-at 2008 10:56

Saattuneersut ulluni makkunani INI-mit tikeraarneqarnissamik allagarsiortorput. Siunnersorneqarnissaq qilanaarigaluarlugu kusanaagisaat tassaavoq, illuutillit tamarmik aqqi, aamma taarsigassarsianut kinguaattoorutinullu tunngasunik allattorsimaffik, tamanut allakkanut ilanngullugu nassiunneqarsimanera.

Aalisartoq piniartorlu kommunalbestyrelsemilu ilaasortaq Apollo Mathiassen ima oqarpoq:

- Isumatsinni ornigulluni siunnersuisoqarnissaa ajunngeqaaq, kisianni taassuma saniatigut allakkanik akueriuminaalluinnartunik aamma pissarsivugut, Apollo Mathiassen oqarpoq.

Allakkat ilanngullugu nassiussat tassaapput Saattuni inuit ataasiakkaat boligstøtte aqqutigalugu illusinermut taarsigassarsisimasut atii, taarsigassarsiaannut aamma taarsersuinerannut aamma kinguaattoorutaannut tunngasut.

- Kisitsisitai atiilu tamavimmik ersipput, assorsuaq taanna mamaatsoorutigisimavarput. Akueriuminaatsillugulu INI-minngaanniit periuseq, Apollo Mathiassen oqarpoq.

- Kanngugisorujussuullugu misigisimavugut. Nunaqqatigiinni taama inunnut amerlatigisunut takusassiineruvoq kusanaatsoq.

Apollo Mathiassen nammineq kisimi taama allagarsisimanerluni

- Oqaloqatiginerini misisisimavunga assut attortisimaartut.

Saattormiuginnaanngillalli. Uummannap kommunea arlariissuarnik nunaqarfeqarmat suli allanut paasiniaanngilanga, kisianni aperisamma ilaaninngaanniit ilisimatinneqarpunga aamma nunaqarfinni allani taama pisoqarsimasoq. Tamannalu akuerineqarsinnaanngilluinnarpoq. Inuit takusassiarineqarput kusanaalluinnartumik, Apollo Mathiassen taama oqarpoq.

INI A/S-iminngaanniit oqaaseqartitsiniaraluaratta iluatsitsinngilagut.