Saattuni Nukissiorfik uuliaarluarsimavoq

Saattuni Nukissiorfik tallimanngormat uuliaarluersimavoq, qanoq annertutiginera erseqqissumik oqaatigineqarsinnaanngitsumik. Aamma timmissat nunaqarfimmut qanittumi takussaasaraluartut takussaajunnaarsimapput.
Allattoq Louise M. Kleemann
aggustip 13-at 2008 10:34

200 liiteri taaneqarpoq aamma 1000 liiteri taaneqarluni. Uuliaarluerneq assut suli tipeqartoq, Saattuni nunaqarfimmi aqutsisut siulittaasuata tulliata, Ane Hammond-ip, radioaviisimut oqaatigaa.

- Ilaana tipeqartorujussuuvoq, qanilliliinnarlugu assorujussuaq tipeqarpoq, pingaartumik anorsaalaarnerani. Maani sissamut qaninnerusumi illoqartugut igalaavulluunniit ammatissinnaanngilavut, illutta ilua solaarisunnitsumik tipeqalertarmat, Ane Hammond oqarpoq.

Qanoq annertutigisumik kuuttoqarsimanera ima oqaatigaa:

- Takanani tankimi sulisoq ippassaq paasiniaaffigikumisaarakku oqarpoq, missiliorsinnaanagu immaqa 200 liiteri. Kisianni kukkusimagunarluni oqarpoq, immaqa 1000 liiteri tungaanut kuussimassaaq.

Kuuttoorneq talittarfimmut sunniuteqarsimavoq aamma timmissat nunaqarfiup qanitaaniittaraluartut takussaajunnaartut Ane Hammond-ip oqaatigaa. Aamma aalisartut umiatsiaararsortut pituutaat atorsinnaajunnaarsimasut oqaatigaa.

- Tassami uuliarsuarmit atorsinnaajunnaartutut ipput, Ane Hammond naggataagut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq