Saattuat suli mianernarput

novembarip 29-at 2006 10:13

Assagiarsunniarnerulernissamut isumalluaatissaqanngikkallarpoq,tassa saattuartassat aappaagu amerlineqanngikkallarnissaat inassutigineqarpoq. Taama Nunatta Pinngortitaleriffiani biologit aappaagu 2007-mi saattuarniartitsinissamut atatillugu siunnersuuteqarput.

Raajat saattuallu pillugit, biologit aappaagu 2007-imut siunnersuinerminni inassutigaat saattuartassiissutissat siornatulli amerlassuseqartariaqartut. Saattuat ikiliartorunnaarsimapput, patajaatsumilli amerliartoqqilissappata pisassiissutissat amerlineqassanngikkallartut, biologit inatsipput.

Sisimiut avataanni ukiuni marlunni kingullerni saattuarniarneq matoqqatinneqarpoq, tassanilu saattuat amerliartorluaraluartut, taamaattoq amerlilluanngippata aalisarneqarnissaat inassutiginartinneqanngilaq.

Maannamut saattuartat 80 procentiisa qalipaat aqitsuupput, tamannalu saattuat aalisapillunneqarnerannut takussutissaasoq, biologit naliliipput. Saattuartattaaq amerlanersaat inerisimasunngorlaammata, saattuaqassuseq suli ernumanartoqarsinnaammat biologit inatsipput saattuarniarneq marsip naaneraniit julip qeqqata tungaannut ingerlanneqartassasoq.

Biologit aappaagumut saattuartassiissutigineqartussatut siunnersuutaat imaapput:

Qeqertarsuup Tunuani sinerissap qanittuani 1800 tonsit avataasiortunullu 130 tonsit.

Maniitsoq matoqqagallassaaq. Sisimiuni sinerissamut qanittumi aappaagu 350 tonsit saattuartassiissutaanissaat biologinit siunnersuutigineqarpoq. Sisimiuni sinerissap avataanut pisassiisoqannginnissaa siunnersuutigineqarluni.

Nuummi Paamiunilu sinerissap qanittuani 700 tonsit avataasiortunullu 1600 tonsit.

Sineriammi saattuat amerlassusaat suli ernumanartoqartinneqartoq raajat ikiliartunngimmata aappaagu rajartassat ikilineqassanngitsut biologit inatsipput. Saarulliit aamma amerliartorpput saarulliilluni raajatorluartuummata, raajat siunissami ikileriarsinnaanerat aamma eqqoriarneqarpoq.