Saattuat pillugit naalakkersuisut isumartik aalajangiusimavaat

Aalisartut siunissaq ungasissoq isigalugu ataavartumik aningaasarsiortuaannarsinnaanissaat qulakkeerumallugu, piujuaannartitsinissarlu pingaartinneqarmat, saattuarniarneq ukiumut qaammatini pingasuni matoqqasassasoq naalakkersuisut aalajangiusimavaat.

Tamanna pillugu aalisartut oqartussallu akornanni 2004-miilli isumaqatigiissuteqartoqareersimasoq, Aalisarnermut Piniarnermullu naalakkersuisup Finn Karlsenip oqaatigaa.

Aalisarnermut naalakkersuisup tamanna pillugu nassuiaateqarnissaa, KNAPK-p siulittaasuata Peter Olsenip kattuffik sinnerlugu piumasarisimavaa, Finn Karlsenilli oqaatigaa KNAPK-p ilaasortaminut nammineq nassuiaatigisimasariaqaraluaraa 2004-mili isumaqatigiissutigineqareersoq saattussat qaleruaasa aqilinerisa nalaani qaammatini pingasuni aalisarneqaqqusaassanngitsut:

- Tamanna pillugu KNAPK-p ilaasortaminut nammineerluni nassuiaatigisimasariaqaraluarpaa. Aalisarnermut siunnersuisut taamanikkut aalajangeeqataapput, Finn Karlsen oqarpoq.

Saattussat ataatsikkut aqilineq ajormata, saattuarniat KNAPK-lu naalakkersuisunut allagaqaateqarlutik piumasarivaat saattussat sumiiffikkaarlugit matoqqatinneqartassasut, Finn Karlsenillu paasilluarpai, piujuaannartitsinissarli pingaarnerunerarlugu:

- Sumiiffiit ilaanni aqinngittunik qalerualinnik assagiarsoqartuaannarpoq. Aqittunik qaleruallit pisarineqaraangata avammut igeqqinneqartarput, amerlanerpaartaalu uumaneq ajorput, taamaammat piujuaannartitsinissaq eqqarsaatigalugu saattuat aqitsunik qaleruaqaraangata uninngatittariaqassavagut, Finn Karlsen naggasiivoq.