Saattuat Paamiuni eqqartorneqarput

Saattuarniarneq saattuarniarnerullu kingunerisartagai Paamiuni SIP-mi KNAAP-milu ilaasortat, saattuanik tunitsiviup, Royal Greenlandip immikkoortuata Paamiullu Kommuniata januaarip naalernerani nalilersussavaat.

- Aalisartut ukiuni arlaqalersuni kissaatigisimavaat, saattuarniarneq aasaanerani unitsinneqartassasoq, nungusaataanngitsunik aalisartarnissaq suleqataaffigiumallugu. Kisianni aningaasarsiorfiusinnaasunik allanik soqanngilaq. Saarullinnik 5 tonsinik Royal Greenland taamaallaat pisisinnaavoq. Taakku ikippallaaqaat. Taamaattumik aalisarnermut attuumassutillit tamaasa peqatigalugit, kommunimi suliffissaaleqineq qanoq ililluta akiorniassaneripput oqaluuserissavarput, borgmester Lars Sørensen oqarpoq.

Saattuarniarneq ukioq naavillugu unitsinneqarnani ingerlanneqarmat, pisassiissutigineqartut sukkasuumik nungunneqarput. Aasaanerani qaammatini pingasuni unitsinneqartuuppat, Royal Greenland-ilu aalisartut pisaannik akilersinnaasumik pisiortorluni, saattuartassat ukiup sinneranut taamaalillutik naammattusaarneqarsinnaagaluarput.

- Oqaluuserisatta inerneri Namminersornerullutik Oqartussani Aalisarnermut Pisortaqarfimmut januaarimi nassiutissavavut, neriuppugullu Royal Greenland A/S, Namminersornerullutik Oqartussanit pigineqartoq, kommunitsinnut iluaqusiitinneqarumaartoq, Lars Sørensen oqarpoq.