Saattuat nunatsinni amerlagisassaanngillat
Saattuat saattuarniarfinni Kalaallit Nunaanni tamangajammi amerlagisassaanngillat. Pinngortitaleriffimmi biologit taama ilisimatitsipput, saattuallu ukiumi aggersumi amerlinissaat taakku ilimaginngilaat.
Saattuat pisarineqartartut ukiuni kingullerni ikileriarsimanerat biologit ilaatigut tunngavilersuutigaat. Saattuarniarfik Nuuk- Paamiut sinerissami saattuarniarfinnut allanut sanilliullugu immikkooruteqarpoq. Pullammi ataatsimi tassani pisaasartut ukiut kingulliit ingerlanerini qaffakkiartorsimapput.
Taamaakkaluartoq biologit neriulluanngillat, saattuarniammi amerlanernik pisassinneqarnissaat biologit ilimaginngilaat.
Aappaagu saattuarniarnissamut biologit siunnersuutiminni innersuutigaat, nunap iluatigut saattuarniarnermi 1.800 tonsit pisarineqarsinnaassasut, Qeqertarsuullu Tunuani avataani saattuartassat 130 tonsiussasut.
Sisimiut sineriaanni saattuat 250 tonsit taamaallaat pisarineqassasut biologit siunnersuutigaat, Nuup Paamiullu akornanni nunap iluatigut aqqutini annerpaamik 700 tonsit avataanilu 1.600 tonsit innersuussutigalugit.
Saattuat pillugit biologit canadamiut suleqatigilluinnarlugit Kalaallit Nunaanni saattuarniarnissaq siunnersuusiorneqarpoq.
